सहकारी पतसंस्थांच्या प्रतिनिधींची उपस्थिती; एकदिवसीय उपक्रमाला उत्स्फूर्त प्रतिसाद
| रायगड | जिल्हा प्रतिनिधी |
जिल्हा उपनिबंधक, सहकारी संस्था व रायगड जिल्हा सहकारी पतसंस्था महासंघ यांच्या संयुक्त विद्यमाने एकदिवसीय प्रशिक्षण कार्यशाळा आयोजित करण्यात आली होती. ही कार्यशाळा अलिबागमधील रायगड जिल्हा मध्यवर्ती सहकारी बँकेच्या मुख्य कार्यालयाच्या सभागृहात उत्साहात व शिस्तबद्ध वातावरणात पार पडली. या कार्यशाळेत जिल्ह्यातील 94 सहकारी पतसंस्थांचे एकूण 247 प्रतिनिधी तसेच जिल्ह्यातील, सर्व तालुक्यांचे सहाय्यक निबंधक आवर्जून उपस्थित राहिले होते.
या कार्यशाळेचे उद्घाटन जिल्हा उपनिबंधिक तनवीर पाटील यांच्या हस्ते करण्यात आले. या कार्यक्रमाला प्रमुख उपस्थिती म्हणून रायगड जिल्हा सहकारी पतसंस्था महासंघाचे अध्यक्ष ॲड. जे.टी. पाटील, रायगड जिल्हा मध्यवर्ती सहकारी बँकेचे मुख्य कार्यकारी अधिकारी मंदार वर्तक, रायगड जिल्हा सहकारी पतसंस्था महासंघाचे सचिव योगेश मगर, रोह्याच्या सहाय्यक निबंधक रेखा गावडे आदी मान्यवर उपस्थित होते. या कार्यशाळेचे प्रास्ताविक रेखा गावडे यांनी केले. त्यांनी कार्यशाळेचा उद्देश स्पष्ट करताना सहकार विभागाच्या नवीन नियमावली, परिपत्रके व मार्गदर्शक तत्त्वांचे प्रभावी पालन करण्यासाठी अशा प्रशिक्षण उपक्रमांची आवश्यकता अधोरेखित केली.
कार्यशाळेतील पहिल्या सत्रात सहकार विभागाचे नवीनतम परिपत्रके व मार्गदर्शक तत्त्वे या विषयावर पुणे येथील पिपल्स को-ऑप. बँकचे माजी मुख्य कार्यकारी अधिकारी सदानंद दिक्षित यांनी सविस्तर मार्गदर्शन केले. पतसंस्थांनी पारदर्शकता, लेखापरीक्षण शिस्त, सदस्यांशी संवाद आणि कायदेशीर बाबींचे काटेकोर पालन यावर विशेष भर द्यावा, असे त्यांनी सांगितले. दुपारच्या सत्रात प्रभावी वसुलीसाठी पुनर्प्राप्ती व्यवस्थापन व कायदेशीर पावले या विषयावर सदानंद दिक्षित यांनीच सखोल विवेचन केले. वाढती थकबाकी, कर्जवसुलीतील अडचणी, कायदेशीर उपाययोजना, मध्यस्थी व समेट प्रक्रिया याबाबत त्यांनी उदाहरणांसह मार्गदर्शन केले. सत्रानंतर प्रश्नोत्तरांमध्ये प्रतिनिधींनी विविध शंका उपस्थित केल्या, त्यांचे समाधानकारक निरसन करण्यात आले.
कार्यक्रमाच्या समारोपप्रसंगी प्रमाणपत्र वितरण करण्यात आले. रायगड जिल्हा सहकारी पतसंस्था महासंघाचे सचिव योगेश मगर यांनी आभार व्यक्त केले. भविष्यातही अशा उपक्रमांद्वारे सहकार क्षेत्र अधिक सक्षम करण्याचा निर्धार त्यांनी व्यक्त केला. संपूर्ण कार्यशाळा अत्यंत नियोजनबद्ध, शिस्तबद्ध व सकारात्मक वातावरणात पार पडली असून सहकार क्षेत्रातील प्रशासकीय व कायदेशीर जाणिवा अधिक दृढ करण्यास या उपक्रमाचा निश्चितच लाभ होणार असल्याची भावना उपस्थितांनी व्यक्त केली.