ट्रकच्या धडकेत तरुणीचा दुर्दैवी मृत्यू

| पुणे | प्रतिनिधी |

महाबळेश्वरला फिरण्यासाठी निघालेल्या तरुणाच्या मोटारसायकलला ट्रकने पाठीमागून जोरदार धडक दिली. या अपघातात दुचाकीवर मागे बसलेली तरुणी ट्रकखाली सापडल्याने जागीच मृत्युमुखी पडली. दुचाकीचालक गंभीर जखमी झाला आहे. या अपघातप्रकरणी मोहम्मद शेख (29) याने दाखल केलेल्या तक्रारीनुसार ट्रकचालक सोनुकुमार नागेंद्रसिंग , वडाळा मुंबई याच्या विरुद्ध गुन्हा दाखल करण्यात आला आहे. रुबल सिन्हा (25), पुणे या तरुणीचा दुर्दैवी मृत्यू झाला. पुणे-सातारा महामार्गावर सारोळा नीरा नदीच्या पुला पलीकडे शिंदेवाडी गावच्या हद्दीत हा अपघात झाला.

एका आय टी कंपनीमध्ये कामास असलेले रुबल व तिचा मित्र शहाऊद शेख हे दोघे एका दुचाकीवर व त्यांचे मित्र मोहम्मद सलमान शेख व शाहरुखअली शेख एका दुचाकीवर अशा दोन दुचाकीवर चौघे मित्र रविवारी (दि.12) सकाळी महाबळेश्वरला निघाले. सकाळी पावणेनऊच्या सुमारास सारोळा येथील नीरा नदीचा पूल पार करून शिंदेवाडी गावच्या हद्दीतून जाताना शहाऊद व रुबल याच्या मोटारसायकलला मागून येणाऱ्या भरधाव ट्रकने धडक दिली. यामध्ये दुचाकी चालवणारा शहाऊद मोटारसायकलसह डाव्याबाजूस पडला तर मागे बसलेली रुबल उजव्या बाजूस ट्रकसमोर पडली. ट्रक तिच्या अंगावरून गेल्याने तिचा जागीच मृत्यू झाला. मागून दुसऱ्या दुचाकीवरील मोहम्मद सलमान व शाहरुख्अली यांनी तातडीने रुग्णवाहिका बोलावून शहाऊद दोघांना रुग्णालयात नेले. परंतु, रुबल हिचा उपचारापूर्वीच मृत्यू झाला होता. शिरवळ पोलिसांनी घटनास्थळी धाव घेऊन अपघातस्थळाची वाहतूक सुरळीत केली. शिरवळ पोलिस ठाण्याचे निरीक्षक संदीप जगताप यांच्या मार्गदर्शनाखाली पोलिस कर्मचारी पुढील तपास करीत आहेत.