आंतरराज्य टोळीला ठोकल्या बेड्या

पनवेलसह नवी मुंबई व दिल्ली परिसरात गंभीर गुन्हे

| पनवेल | प्रतिनिधी |

पनवेलसह नवी मुंबई व दिल्ली परिसरात गंभीर गुन्हे करून धुमाकूळ घालणार्‍या आंतरराज्यीय सराईत टोळीला मध्यवर्ती कक्ष गुन्हे शाखेने गजाआड करून त्यांच्याकडून मोठ्या प्रमाणात लाखो रुपये किमतीचा ऐवज हस्तगत केला आहे.

दोन अज्ञात इसमांनी महिलेच्या गळ्यातील 18 ग्रॅम वजनाचे मंगळसूत्र जबरीने हिसकावून काळ्या रंगाची केटीएम मोटारसायकलवरुन पळून गेल्याची तक्रार कामोठे पोलीस ठाण्यात करण्यात आली होती. त्याचप्रमाणे सीबीडी, खारघर, पनवेल शहर, कळंबोली, नेरूळ, वाशी, सानपाडा व कामोठे परिसरातदेखील अशा प्रकारचे गुन्हे दाखल करण्यात आलेले होते. याबाबतच्या तक्रारी संबंधित पोलीस ठाण्यात दाखल होताच पोलीस आयुक्त मिलिंद भारंबे, पोलीस सह. आयुक्त संजय ऐनपुरे, अपर पोलीस आयुक्त (गुन्हे) दिपक बाकोरे, पोलीस उपायुक्त अमित काळे आदींनी नवी मुंबई पोलीस आयुक्तालयामध्ये महिलांसंबंधीच्या गुन्ह्यांना प्रतिबंध करणे व रस्त्यावर घडणार्‍या गुन्ह्यांवर प्राधान्य आणण्यासंदर्भात गुन्हे प्रकटीकरण शाखेला सूचना केल्या. त्यानुसार सहा.पोलीस आयुक्त गुन्हे शाखा अजय लांडगे यांच्या मार्गदर्शनाखाली वपोनि मध्यवर्ती कक्ष सुनील शिंदे यांच्यासह सपोनि श्रीनिवास तुंगेनवार, सपोनि सतिश भोसले, सपोनि महेश जाधव, सपोनि निलम पचार, पोउपनि राहुल भदाणे, सहा. पोलीस उपनिरीक्षक मंगेश वाट, पोहवा शशिकांत शेंडगे, मपोहवा उर्मिला बोराडे, पोहवा अनिल यादव, पोहवा संजय राणे, पोहवा महेश पाटील, पोना सचिन टिके, पोना निलेश किंद्र, पोना राहूल वाघ, पोना अजय कदम, पोना महेश अहिरे, पोना सतिश चव्हाण, पोना नितिन परोडवाड आदींच्या पथकाने घटनास्थळी भेटी देऊन समांतर तपास करुन मोटारसायकल चोरी व चेन स्नॅचिंग उघडकीस आणण्याकरिता सुमारे एक आठवडा तांत्रिक तपास करून उलवे परिसरातून 40 ते 45 सोसायट्या व गेस्ट हाऊस तपासून आरोपी सागर जुगेश मेहरा (27), अभय सुनिलकुमार नैन (19), शिखा सागर मेहरा (27), अनुज विरसींग छारी (24) आदींना वेगवेगळ्या ठिकाणावरुन ताब्यात घेतले.

त्यांच्याकडून नवी मुंबई परिसरात जबरी चोरीचे 07 गुन्हे, वाहन चोरीचे 02 गुन्हे व दिल्ली येथील 1 गुन्हा असे एकुण 10 गुन्हे उघडकीस आले आहेत. तसेच आरोपी कमांक 1 याच्याविरूध्द दिल्ली येथे 37 गुन्हे दाखल असून, त्याच्याविरूध्द न्यायालयाने चार गुन्ह्यात जाहीरनामे प्रसिद्ध केले आहेत. या आरोपींकडून आतापर्यंत एक सोन्याचे मंगळसूत्र, तीन सोन्याच्या चेन, दोन तुटलेल्या सोन्याच्या चेनचे तुकडे असे एकूण 66 ग्रॅम वजनाचे सोन्याचे दागिने, दोन केटीएम मोटारसायकल असा एकूण 7,70,000/- रूपये किमतीचा मुद्देमाल हसतगत करण्यात आला आहे.