। पनवेल । वार्ताहर ।
परदेशातून फळं आयात करणाऱया एपीएमसीतील एका कंपनीत काम करणार्या दोघा कर्मचार्यांनी ब्लुबेरी व अव्हकडु ही महागडी फळे कंपनीतून काढून त्यांची परस्पर विक्री करुन कंपनीची तब्बल 25 लाख रुपयांची फसवणूक केल्याचे उघडकीस आले आहे. तेजस शिंदे व जुनेद शेख अशी या कर्मचार्यांची नावे असून एपीएमसी पोलिसांनी या दोघांविरोधात अपहाराचा गुन्हा दाखल करुन दोघांना ताब्यात घेतले आहे.
एपीएमसीतील फळ मार्केटमधील अनुसया फ्रेश इंडिया प्रा.लि. या कंपनीमार्फत परदेशातून ब्लुबेरी व अव्हकडु ही फळे आयात केली जातात. त्यानंतर ही कंपनी सदर फळांची एपीएमसी मार्केट व मुंबई परिसरात विक्री करते. याच कंपनीत आरोपी तेजस शिंदे हा चालक म्हणून तर जुनेद शेख हा सेल्समन म्हणून मागील 7-8 महिन्यापासून काम करत होते. गत तीन चार महिन्यांपासून तेजस शिंदे हा कंपनीतून ब्लुबेरी व अव्हकडु ही फळे बाहेर काढुन ते जुनेद शेख याला देत होता. त्यानंतर जुनद शेख हा त्यांची परस्पर विक्री करुन त्यातून मिळणारे पैसे दोघेही वाटून घेत होते. मात्र गत महिन्यापासून तेजस शिंदे हा कंपनीला न कळविता वारंवार गैरहजर राहु लागल्याने कंपनीने त्याला गत महिन्यामध्ये कामावरुन काढून टाकले होते. तसेच तेजसच्या जागेवर विजय राठोड याला कंपनीमध्ये चालक म्हणून ठेवले होते.
त्यानंतर गत आठवडयामध्ये जुनेद शेख याने विजय राठोड याला कंपनीतून ब्लुबेरी व अव्हकडु हे फळ चोरुन काढून देण्याबाबत विचारणा केली. हि बाब विजय राठोड याने कंपनीच्या व्यवस्थापकांना सांगितल्यानंतर कंपनीने जुनेदला बोलावून त्याच्याकडे चौकशी केली असता, त्याने कंपनीतून ब्लुबेरी व अव्हकडु या फळांची बाहेर परस्पर विक्री केल्याचे तसेच चालक तेजस शिंदे हा त्याला कंपनीतून माल बाहेर काढून देत असल्याचे कबुल केले. त्यानंतर कंपनीने सफ्टेंबर ते नोव्हेंबर या तीन महिन्यातील कंपनीच्या रेकॉर्डची तपासणी केली असता, तेजस शिंदे व जुनेद शेख या दोघांनी तब्बल 25 लाख 8 हजार रुपये किंमतीच्या फळांचा अपहार केल्याचे आढळून आले. त्यानंतर कंपनीने या दोघांविरोधात एपीएमसी पोलीस ठाण्यात तक्रार दाखल केली.