महाडला गोगावले समर्थनाचे शक्तिप्रदर्शन

। महाड । प्रतिनिधी ।
बंडखोरीत सामील असलेले आ.भरत गोगावले यांना समर्थन देण्यासाठी गुरुवारी( 30 जून) महाड मध्ये शक्तिप्रदर्शन करण्यात आले. यावेळी गोगावले यांनी ऑनलाईन आणि विकास गोगावले शक्तिप्रदर्शनाला संबोधित करताना राष्ट्रवादी काँग्रेस आणि शिवसेना नेते अनंत गीते यांच्यावर जहरी टीका केली. आमच्यामुळेच गीते यांची ओळख असल्याचे भरत गोगावले यांनी स्पष्ट केले तर बाटलीत बंद करणारा अद्याप तयार व्हायचा आहे असा टोला विकास गोगावले यांनी दिला.

महाड मधील शिवाजी महाराज चौक येथे सकाळी 11 वाजल्यापासून शिवसैनिक जमण्यास सुरवात झाली होती. तालुक्यातील जिल्हा परिषद मतदारसंघ आणि पंचायत समिती गटातून हजारो समर्थकांना एकत्रित करण्यात आले होते. छ.शिवाजी महाराज चौक येथे जमलेल्या गोगावले समर्थकांना आपली भूमिका डिजिटल माध्यमातून समजावून सांगितली. यावेळी युवा सेनेचे दक्षिण रायगड प्रमुख विकास गोगावले, तालुकाप्रमुख सुरेश महाडिक, विजय सावंत, माजी जिल्हा परिषद सदस्य जितेंद्र सावंत, संजय कचरे, मनोज काळीजकर, इक्बाल चांदले, डॉ.चेतन सुर्वे, आदी पदाधिकारी उपस्थित होते.

यावेळी आपली भूमिका समजावून सांगताना भरत गोगावले यांनी राष्ट्रवादी काँग्रेस पक्षाने जिल्ह्यात केलेल्या हस्तक्षेपामुळे आपल्याला हा निर्णय घेणे भाग पडले असे सांगितले. तर उद्धव ठाकरे यांना फसवण्याचे काम संजय राऊत यांनी केले असून संजय राऊत कधी रायगडावर आले आहेत का असा प्रश्‍न देखील भरत गोगावले यांनी केला. महाड मधील महापुरानंतर एकनाथ शिंदे यांनी केलेली मदत महाडकर विसरू शकणार नाहीत असे सांगितले.

विकास गोगावले यांनी देखील अनंत गीते यांच्यावर टीकेची झोड उठवून अनंत गीते यांच्या प्रचारासाठी आम्ही आमच्या घरातील दागिने गहाण ठेवले आहेत. आम्ही गीते यांना नेते मानतो मात्र आमच्या वाटेला गेलात तर सोडणार नाही असा सज्जड दम देखील दिला. गोगावले यांच्या समर्थनार्थ जमलेल्या शिवसेनेच्या पदाधिकार्‍यांनी राष्ट्रवादी काँग्रेस पक्षावर टीकेची झोड उठवली. महाविकास आघाडी असताना देखील रायगड जिल्ह्यात निधी वाटपात आणि इतर कामात केला जाणारा हस्तक्षेप यामुळे शिवसेनेमध्ये तीव्र नाराजी व्यक्त केली जात होती, यामुळे एकनाथ शिंदे यांच्या नेतृत्वावर विश्‍वास व्यक्त करून आघाडी तोडण्याचा निर्णय घेण्यात आल्याचे सांगितले. तर जिल्ह्यात उद्धव ठाकरे यांच्या समर्थनार्थ झालेल्या सभेतून अनंत गीते यांनी बंडखोर आमदारांवर टीका केली. याला देखील उपस्थित पदाधिकार्‍यांनी उत्तर देत अनंत गीते यांना टीकेचे लक्ष केले.