पुणे हादरले! स्वारगेट बसस्थानकात तरुणीवर शिवशाहीमध्येच अत्याचार

| पुणे | प्रतिनिधी |

पुणे –  स्वारगेट एसटी स्टँड परिसरात उभ्या असलेल्या शिवशाही बसमध्ये 26 वर्षीय तरूणीवर बलात्कार करण्यात आल्याची संतापजनक घटना घडली आहे. पहाटे 5.30 वाजण्याच्या सुमारास घडलेल्या या घटनेमुळे परिसरात खळबळ उडाली आहे. पोलिसांकडून आरोपीचा शोध घेण्यात येत आहे.

मिळालेल्या माहितीनुसार, पीडित तरुणी पुण्यातून फलटणच्या दिशेने प्रवास करत होती. स्वारगेट एसटी स्टँड येथे थांबल्यानंतर एका अनोळखी व्यक्तीने तिची बस दुसऱ्या ठिकाणी थांबली असल्याचे सांगितले. मात्र, तरुणीने त्याच्यावर विश्वास ठेवला नाही. यादरम्यान आरोपीने तिच्या एकटेपणाचा फायदा घेत तिला विश्वासात घेतले आणि जवळ उभ्या असलेल्या एका बंद शिवशाही बसकडे घेऊन गेला. बस बंद असल्याचे लक्षात आल्यानंतरही आरोपीने तिला आत जाण्यास सांगितले आणि स्वतःही बसमध्ये घुसला. त्यानंतर त्याने तिच्यावर जबरदस्ती केली आणि लगेचच तिथून फरार झाला.  या धक्कादायक घटनेनंतर तरुणी फलटणला जाण्यासाठी बसमध्ये बसली होती. बसमध्ये बसल्यानंतर तिने आपल्या मित्राला फोन करून संपूर्ण प्रकार सांगितला. मित्राने तिला पोलिसांकडे जाण्याचा सल्ला दिला, यानंतर तिने स्वारगेट पोलीस ठाणे गाठून तक्रार दाखल केली.  पोलिसांनी अज्ञात आरोपीविरोधात बलात्काराचा गुन्हा दाखल केला असून, वेगवेगळ्या पथकांमार्फत शोधमोहीम सुरू केली आहे. स्वारगेट बस स्थानक परिसरातील सीसीटीव्ही फुटेजच्या आधारे आरोपीची ओळख पटली असून, लवकरच त्याला अटक करण्यात येईल, असा दावा पोलिसांनी केला आहे.  ही घटना समोर आल्यानंतर एसटी स्थानक परिसरातील सुरक्षेवर मोठे प्रश्नचिन्ह निर्माण झाले आहे. महिलांच्या सुरक्षेसाठी ठोस उपाययोजना करण्याची गरज अधोरेखित झाली आहे.