13 आरोपींना केली अटक
| पनवेल | प्रतिनिधी ।
पनवेल तालुका पोलिसांनी ऑनलाईन सट्टेबाजी व जुगार रॅकेटवर मोठी कारवाई करत 13 आरोपींना अटक केली असून, त्यांच्याकडून सुमारे 2 लाख 71 हजार 630 रुपयांचा मुद्देमाल जप्त करण्यात आला आहे. ही कारवाई वाकडी येथील परिसरात करण्यात आली.
पोलिसांनी दिलेल्या माहितीनुसार, आरोपींनी संगनमत करून भारतात प्रतिबंधित असलेल्या ऑनलाईन गेमिंग ॲप व वेबसाईटच्या माध्यमातून लोकांना सट्टेबाजीस प्रवृत्त केले. यासाठी विविध व्यक्तींच्या बँक खात्यांची माहिती, पासबुक, एटीएम कार्ड, मोबाईल क्रमांक तसेच इतर कागदपत्रांचा वापर करण्यात येत होता. आरोपी ‘लोटस 365’ नावाच्या ॲप/लिंकच्या माध्यमातून क्रिकेटसह विविध खेळांवर ऑनलाईन सट्टा खेळण्याची सुविधा पुरवत असल्याचा आरोप आहे. कारवाईदरम्यान पोलिसांनी आरोपींकडून 17 मोबाईल फोन, 6 लॅपटॉप, 4 लॅपटॉप चार्जर, 4 एक्स्टेन्शन बोर्ड, 10 मोबाईल चार्जर, एक वाय-फाय राऊटर, पासबुक, चेकबुक, क्रेडिट व डेबिट कार्ड, सिमकार्ड, पासपोर्ट तसेच लेखनासाठी वापरल्या जाणाऱ्या डायऱ्या जप्त केल्या. जप्त मुद्देमालाची किंमत 2,71,630 इतकी आहे. या प्रकरणी आरोपींविरुद्ध गुन्हा दाखल करण्यात आला आहे. ही कारवाई पोलीस निरीक्षक दिपाली पाटील (सायबर सेल), सहाय्यक पोलीस निरीक्षक अनुरुद्ध गिजे, तसेच पनवेल शहर व पनवेल तालुका पोलिसांच्या पथकाने केली. पुढील तपास सुरू आहे.