अंगणवाडी सेविकांना मिळणार प्रोत्साहन भत्ता

। रायगड । वार्ताहर ।

महिला व बाल विकास विभागाच्या अंतर्गत मुख्यमंत्री माझी लाडकी बहीण योजना लागू करण्यात आली आहे. योजनेंतर्गत पात्र महिलांचे अर्ज नारी शक्ती दूत अ‍ॅप आणि लाडकी बहीण वेब पोर्टलवरून भरण्याची जबाबदारी अंगणवाडी सेविकांना देण्यात आली होती. यानुसार रायगड जिल्ह्यासाठी 1 कोटी 14 लाख 83 हजार 900 इतके अनुदान मंजूर झाले असल्याची माहिती जिल्हा महिला व बाल विकास अधिकारी सुहिता ओव्हाळ यांनी दिली आहे.

रायगड जिल्ह्यातील अंगणवाडी सेविका आणि मुख्य सेविकांना एकूण 1,14,83,900 रुपयांचे प्रोत्साहन भत्त्याचे अनुदान मंजूर करण्यात आले आहे. अंगणवाडी सेविकांनी नारी शक्ती दूत अ‍ॅप आणि लाडकी बहीण वेब पोर्टल वर यशस्वीपणे नोंदवलेल्या 2 लाख 29 हजार 184 अर्जांवर आधारित 50 रूपये प्रति अर्ज प्रमाणे 1,14,59,200 अनुदान मंजूर केले आहे. मुख्य सेविकांनी नोंदवलेल्या 494 अर्जांवर आधारित 50 रूपये प्रति अर्ज प्रमाणे 24,700 अनुदान मंजूर आहे. हे अनुदान तालुकानिहाय बाल विकास प्रकल्प अधिकारी यांच्या डीडीओ खात्यावर वर्ग करण्यात आले असून, अंगणवाडी सेविकांच्या खात्यावर भत्ते वर्ग करण्याची कार्यवाही सुरू आहे.