बेकायदा खोदकाम बांधकाम विभाग रोखणार का
। नेरळ । वार्ताहर ।
कळंब नेरळ माथेरान राज्य मार्ग रस्त्याच्या बाजूला असलेल्या साईड पट्ट्या खोदून त्यात केबल टाकल्या जात आहेत. या केबलसाठी बेकायदा रस्ते खोदले जात असुन रात्री एक दुचाकीस्वार त्या खड्ड्यात आपल्या गाडीसह कोसळला. त्यामध्ये तो किरकाळ जखमी झाला. दरम्यान, सार्वजनिक बांधकाम विभाग अशा खोदकाम करणार्यांवर कारवाई करणार आहे काय? असा प्रश्न दुचाकीस्वार यांनी उपस्थित केला आहे.
नेरळ कळंब राज्य मार्गावरील वरई ते पोही दरम्यान रस्त्याच्या बाजूला एका खाजगी कंपनीचे लाईन टाकण्याचे काम सुरु आहे. या रस्त्याच्या बाजूला साईड पट्टी खोदून त्यात लाईन टाकण्याचे काम सुरु आहे. मात्र हे काम करत असताना संबंधित ठेकेदाराने कोणतीच खबरदारी घेतली नाही. काम सुरु असताना कोणत्याही प्रकारचे सूचना फलक लावलेले नाहीत. तसेच हे काम करत असताना खड्डे खोदून माती दगड पूर्ण रस्त्यावर आले आहेत. त्यामुळे वाहन चालकांना त्याचा त्रास सहन करावा लागत आहे.
रस्त्यावर दिवसभर वाहनांची खूप वर्दळ असते. कळंब, वारे ओलमन परिसरातील नागरिक या मार्गांवरून प्रवास करत असतात. मंगळवारी रात्री 8 च्या सुमारास बोरगाव गावातील युवक सतीश पाटील हा दुचाकी वरून घरी परत असताना पोशीर गावाच्या पुढे रस्त्याच्या कडेला खोदून ठेवलेल्या खड्यात गाडी कोसळून अपघात झाला. या अपघातामध्ये ते बचावले आहेत.