निवडणूक अधिकाऱ्यांनी लावल्या काळया फिती; मारहाणीची दखल घेण्याची मागणी

| अलिबाग | विशेष प्रतिनिधी |
निवडणूक कर्मचाऱ्यांना प्रांताधिकारी, तहसीलदार यांच्या समक्ष शिवीगाळ आणि मारहाण होवून देखील काहीच कारवाई केली नसल्याच्या निषेधार्थ आज होणाऱ्या ग्रामपंचायत निवडणुकीत सहभाग घेतलेल्या निवडणूक अधिकारी, कर्मचारी यांनी काळया फिती लावत निषेध व्यक्त केला आहे.

बंडखोर आमदार महेंद्र दळवी यांनी ग्रामपंचायत निवडणूक अधिकार्‍याला शिवीगाळ करीत आपल्या कार्यकर्त्यांना चिथावणी देत मारण्याचे आदेश दिल्यानंतर प्रांताधिकारी, तहसिलदारांच्या समक्ष निवडणूक अधिकारी मंगेश पाटील यांना मारहाण झाल्याने जिल्हा परिषद महासंघांने आक्रमक भुमिका घेतली आहे. ही सुरू आलेली निवडणूक प्रक्रिया पूर्ण व्हावी यासाठी मारहाण होवून देखील आपली जबाबदारी पूर्ण पाडण्याचे ठरवले आहे. मात्र जबाबदार अधिकाऱ्यांनी आपल्या समक्ष मारहाण होवूनही कसलीच कारवाई न करता बघ्याची भूमिका घेतली याच्या निषेध व्यक्त केला आहे.

अलिबाग तहसिलदार कार्यालयाच्या आवारातच प्रांताधिकारी प्रशांत ढगे आणि तहसिलदार मिनल दळवी यांच्या समक्ष घडली. निवडणूक प्रक्रियेदरम्यान निवडणूक अधिकार्‍याला आमदारांनी शिविगाळ करीत कार्यकर्त्यांकरवी मारहाण केल्याची घटना घडल्याने संपूर्ण जिल्ह्यात संताप व्यक्त केला गेला. अशावेळी अधिकार्‍यांनी तात्काळ पोलिसांत तक्रार नोंदवून गुन्हा दाखल करण्याची आवश्यकता होती. मात्र याबाबत कोणतीच भुमिका घेतली गेली नसल्याने जिल्हा परिषदेच्या अधिकारी आणि कर्मचारी संघटनांमध्ये संतापाचे वातावरण पसरले आहे.

यांसदर्भात आपली भुमिका निश्‍चित करण्यासाठी निवडणूकीनंतर मतमोजणी होताच जिल्हा परिषदेचे मुख्य कार्यकारी अधिकारी डॉ किरण पाटील यांची भेट शिष्टमडंळाद्वारे घेण्यात येणार असल्याची माहिती अध्यक्ष डॉ कैलास चौलकर यांनी दिली. याबाबत कोणतीही कारवाई करण्यात आली नाही तर यापुढे निवडणूक प्रक्रियेत जिल्हा परिषदेचे अधिकारी सहभागी होणार नाहीत असा इशारा देखील देण्यात येणार आहे. त्याचप्रमाणे यावेळी प्रांताधिकारी आणि तहसिलदार यांची देखील भेट घेऊन आपल्या भावना व्यक्त करण्यात येणार असल्याचे चौलकर यांनी सांगितले.