डॉक्टरसह दोघेजण एसीबीच्या जाळ्यात
| रायगड | जिल्हा प्रतिनिधी |
नवी मुंबई येथील कृषी उत्पन्न बाजार समितीच्या कार्यालयातील डॉक्टरासह स्वच्छता अधिकारी एसीबीच्या जाळ्यात अडकला. मंजूर कामाच्या एका वर्षाच्या बिलाच्या रकमेवर 1 लाख 40 हजार रुपयांची लाच घेतांना त्यांना पकडण्यात आले. नवी मुंबई येथील लाच लुचपत प्रतिबंधक विभागाकडून ही कारवाई करण्यात आली आहे. ठेकेदाराकडूनच ही मागणी केल्याची माहिती समोर आली आहे.
मिळालेल्या माहितीनुसार, डॉ. दिपक आवटे आणि समिर म्हात्रे असे या दोन आरोपींची नावे आहेत. नवी मुंबई येथील कृषी उत्पन्न बाजार समितीच्या मुख्य कार्यालयातील उपसचिव म्हणून दिपक आवटे कार्यरत होते. तसेच समिर म्हात्रे हे जनरेटर ऑपरेटर म्हणून कार्यरत होते. त्यांच्याकडे स्वच्छता अधिकारी म्हणून अतिरिक्त पदभार सोपविण्यात आला होता. या समितीमध्ये तक्रारदार हे ठेकेदार म्हणून काम करतात. ऑक्टोबर ते एप्रिल या दरम्यान बाजार समितीमधील वार्षिक देखभालसह इतर कामांंचा ठेका तक्रारदार यांना मिळाला. या कामाचा कार्यादेश काढण्यात आला होता. त्यावेळी दिपक आवटे आणि समीर म्हात्रे यांनी तक्रारदार अर्थात ठेकेदार याच्याकडे कामाच्या एका वर्षाच्या होणाऱ्या बिलावर जीएसटी वगळून 15 टक्के प्रमाणे 1 लाख 46 रुपयांची लाच मागितली. तडजोडीनंतर 1 लाख 40 हजार रुपये देण्याचे ठरले. या प्रकाराबाबत तक्रारादर अर्थात ठेकेदार यांनी नवी मुंबईच्या लाचलुचपत प्रतिबंधक विभागाकडे तक्रार केली. पोलीस उपअधीक्षक धर्मराज सोनके यांनी या घटनेचे गांभीर्य ओळखून पडताळणी केली. त्यानंतर सापळा रचला. कृषी उत्पन्न बाजार समितीच्या कार्यालयात केबीनमध्ये 1 लाख 40 हजार रुपयांची लाच घेताना रंगेहाथ पकडण्यात आले. त्यांना ताब्यात घेऊन त्यांविरोधात एपीएमसी पोलीस ठाणे नवी मुंबईमध्ये गुन्हा दाखल करण्यात आला आहे.