जिल्हा नियोजन समितीतून निधी मंजूर
| अलिबाग | प्रतिनिधी |
वाढत्या नागरिकीकरणाबरोबरच पर्यटक व नागरिकांच्या सुरक्षेसाठी अलिबाग शहरात लवकरच सीसीटीव्ही कॅमेरे बसविले जाणार आहे. त्यासाठी जिल्हा वार्षिक योजनेअंतर्गत जिल्हा नियोजन समितीमधून निधी मंजूर करण्यात आला आहे. त्यानिमित्ताने माजी नगराध्यक्ष प्रशांत नाईक यांच्यासह माजी नगरसेवक अनिल चोपडा, नगरपरिषद कर्मचारी यांनी वेगवेगळ्या ठिकाणांची पाहणी केली.
अलिबाग हे पर्यटनाच्यादृष्टीने महत्वाचे ठरत आहे. समुद्रकिनारा, कुलाबा किल्ला, सरखेल कान्होजी आंग्रे यांची समाधी पर्यटकांना कायमच भुरळ घालत आली आहे. त्यामुळे अलिबागमध्ये पर्यटकांची संख्या दिवसेंदिवस वाढत आहे. दर आठवड्याला दहा हजार पेक्षा अधिक पर्यटक अलिबागमध्ये येतात. येथील पर्यटन स्थळांचा आनंद घेतात. तसेच वाढत्या नागरिकीकीकरणामुळे शहराचा विस्तार वाढत आहे.
शहरामध्ये वेगवेगळ्या विभागाचे जिल्हा, तालुका कार्यालये आहेत. वेगवेगळ्या शिक्षण संस्था आहेत. याठिकाणी हजारोच्या संख्येने कर्मचारी व विद्यार्थ्यांची वर्दळ असते. शहरातील नागरिकांच्या व पर्यटकांच्या सुरक्षेसाठी माजी नगराध्यक्ष प्रशांत नाईक यांनी पुढाकार घेत शहरात सीसीटीव्ही कॅमेरे बसविण्यासाठी शासनाकडे निधीची मागणी केली होती. जिल्हा नियोजन समितीकडे हा प्रस्ताव पाठविण्यात आला होता. अखेर या प्रस्तावाला मान्यता मिळाली असून शहरात सीसीटीव्ही कॅमेरे बसविण्यासाठी निधी मंजूर करण्यात आला आहे. लवकरच शहरात 32 ठिकाणी कॅमेरे बसविले जाणार आहेत.
शहाराच्या प्रवेशद्वारापासून सार्वजनिक ठिकाणी हे कॅमेरे लावण्यात येणार आहेत. यावर अलिबाग पोलीस ठाणे, वाहतूक शाखा, पोलीस नियंत्रण कक्ष यांचे नियंत्रण राहणार आहे. माजी नगराध्यक्ष प्रशांत नाईक यांनी मंगळवारी दुपारी शहरातील वेगवेगळ्या सार्वजनिक जागांची पाहणी केली. त्यामुळे लवकरच शहरातील संशयीत हालचालीवर सीसीटीव्ही कॅमेरांद्वारे नजर राहणार आहे.