आयपीएलच्या वेळापत्रकात बदल

| नवी दिल्ली | वृत्तसंस्था |

आयपीएल 2026 स्पर्धेत (2026) रविवारी 12 एप्रिलपर्यंत एकूण 20 सामन्यांचं यशस्वीरित्या आयोजन करण्यात आलं आहे. सहभागी एकूण 10 संघांनी प्रत्येकी 4-4 सामने खेळले आहेत. तर प्रत्येक संघासाठी पाचवी फेरी फार निर्णायक ठरणार आहे. त्याआधी बीसीसीआयने मोठी घोषणा केली आहे. बीसीसीआयकडून 19 व्या मोसमाच्या वेळापत्रकात अचानक बदल करण्यात आला आहे.

बीसीसीआयकडून एकूण 2 सामन्यांच्या वेळापत्रकात बदल करण्यात आला आहे. या 2 सामन्यांची तारीख आणि ठिकाण बदलण्यात आलं आहे. चेन्नई सुपर किंग्स आणि गुजरात टायटन्स यांच्यात खेळवण्यात येणाऱ्या दोन्ही संघांच्या सामन्यांमध्ये हा बदल करण्यात आला आहे. बीसीसीआयने सोमवारी 13 एप्रिल रोजी प्रसिद्धीपत्रकाद्वारे या बदलाबाबत माहिती दिली आहे.

यंदा 19 व्या मोसमात गुजरात टायटन्स विरुद्ध चेन्नई सुपर किंग्स यांच्यात 2 सामने खेळवण्यात येणार आहेत. उभयसंघातील पहिला सामना हा 26 एप्रिल रोजी होणार आहे. गुजरात विरुद्ध चेन्नई यांच्यातील सामन्याला अहमदाबादमधील नरेंद्र मोदी स्टेडियममध्ये दुपारी 3 वाजून 30 मिनिटांनी सुरुवात होणार होती. मात्र आता हा सामना त्याच वेळेस मात्र वेगळ्या स्टेडियममध्ये होणार आहे. हा सामना चेन्नईतील एमए चिदंबरम स्टेडियममध्ये होणार आहे.

चेन्नई विरुद्ध गुजरात यांच्यातील दुसरा सामना 21 मे रोजी चेन्नईत आयोजित करण्यात आला होता. हा सामना एमए चिदंबरम स्टेडियममध्ये होणार होता. मात्र या सामन्याचं ठिकाण बदण्यात आलं आहे. सुधारित वेळापत्रकानुसार उभयसंघातील 21 मे रोजी होणारा सामना चेन्नईऐवजी अहमदाबादमधील नरेंद्र मोदी स्टेडियममध्ये होणार आहे. या सामन्याला संध्याकाळी साडे सात वाजता सुरुवात होणार आहे. दरम्यान गुजरात आणि चेन्नई दोन्ही संघांनी 19 व्या मोसमात एकूण आणि प्रत्येकी 4 सामने खेळले आहेत. गुजरातने 4 पैकी 2 सामने जिंकले आहेत. तर चेन्नईला 4 पैकी फक्त 1 सामनाच जिंकता आला आहे.

वेळापत्रकात बदल कशामुळे?
आगामी निवडणुकांमुळे बीसीसीआयने या 2 सामन्यांच्या वेळापत्रकात बदल केला आहे. सध्या 5 राज्यात विधानसभा निवडणुकीची रणधुमाळी पाहायला मिळत आहे. तर अहमदाबाद महानगरपालिकेसाठी येत्या 26 एप्रिलला मतदान होणार आहे. निवडणुकीसाठी मोठ्या प्रमाणात सुरक्षा गरजेची असते. त्यामुळे 26 एप्रिल रोजी अहमदाबादमधील नियोजित सामन्यात बदल करण्यात आला आहे.