सिडकोची घरे सर्वसामान्यांसाठी आश्‍वासक

। नवी मुंबई । प्रतिनिधी ।

सिडकोच्या तळोजा, खारकोपर, बामणडोंगरी आणि द्रोणागिरी या वसाहती आज नवी मुंबईच्या झपाट्याने विकसित होणार्‍या शहरी परिवर्तनाचा केंद्रबिंदू ठरत आहेत. ज्या भागांकडे भविष्यातील शक्यता म्हणून पाहिले जात होते, ते आता सशक्त पायाभूत सुविधा, मूलभूत सेवा आणि सुलभ कनेक्टिव्हिटी यामुळे एक सजीव वास्तव बनले आहेत. येथे होणारी एकत्रित निवासी व व्यावसायिक वाढ ही शहराच्या गतिमान परिवर्तनाचा महत्त्वाचा भाग बनली आहे.

या परिवर्तनामागे सिडकोने दूरदृष्टीने आखलेले व सुनियोजित पद्धतीने अंमलबजावणी केलेले पायाभूत सुविधांचे प्रकल्प हे मुख्य कारण ठरत आहेत. तळोजा आणि खारकोपरमध्ये मेट्रो स्थानके आणि ट्रान्स्पोर्ट हब्स उभारण्यात येत आहेत. ज्यामुळे रहिवाशांना संपूर्ण नवी मुंबईत आणि त्यापलीकडेही जलद व सुलभ प्रवास शक्य होईल. तसेच, सिडकोने फक्त घरे नाही, तर संपूर्ण सर्वसमावेशक व सुनियोजित शहर तयार करण्यावर भर दिला आहे. बामणडोंगरी आणि द्रोणागिरीमध्ये उद्याने, आरोग्य सुविधा, शाळा यांसारख्या सामाजिक सुविधांचा समावेश करण्यात आला आहे. हा समावेश सिडकोच्या समग्र शहरी नियोजन पद्धतीचा भाग आहे. या परिसरात निर्माण होणार्‍या सुविधा केवळ घराजवळ उपलब्ध नसून, त्या रहिवाशांच्या आरोग्य, शिक्षण आणि मनोरंजनाच्या गरजा पूर्ण करतात. त्यामुळे ही घरे राहण्यासाठी सर्वोत्तम पर्याय बनत आहेत.