थेरोंडा येथील सार्वजनिक स्टँड पोस्ट शेडचे लोकार्पण

पाण्याच्या टाकीची दुरुस्ती; रेवदंडा ग्रा.पं.मधून निधी
| अलिबाग | वार्ताहर |
रेवदंडा ग्रामपंचायत हद्दीतील थेरोंडा आगलेची वाडी येथील जीर्ण झालेल्या सार्वजनिक स्टँड पोस्ट शेड आणि पाण्याच्या टाकीची दुरुस्ती करुन तिचा लोकार्पण सोहळा नुकताच पार पडला. ग्रामपंचायतीच्या निधीतून दोन्ही कामे करण्यात आली आहेत. थेरोंडा येथील स्टँड पोस्टची दुरवस्था झाली होती, तसेच पाण्याची टाकीसुद्धा जीर्ण झाल्याने पाण्याची गळती होत होती. परिणामी, महिलांना पाणी भरणे व त्याठिकाणी वावर करणे, कपडे धुणे हे मुश्किल झाले होते. ही गंभीर बाब थेरोंडा आगलेची वाडी येथील संतोष टिवळेकर व अमोल टिवळेकर यांनी ग्रामपंचायतीच्या लक्षात आणून देत दोन्ही काम तातडीने पूर्ण करण्यासाठी पाठपुरावा केला. त्यांच्या पाठपुराव्याला यश आले असून, आज दोन्ही कामे ग्रामपंचायतीच्या निधीतून करुन देण्यात आली आहेत. या कामांचा लोकार्पण सोहळा दि. 21 जानेवारी रोजी सरपंच मनीषा चुनेकर यांच्या हस्ते श्रीफळ वाढवून करण्यात आला. यावेळी ग्रा.पं. सदस्य राजन वाडकर, संदीप खोत, शेकाप कार्यकर्त्यांसह ग्रामस्थ मोठ्या संख्येने उपस्थित होते.