‘टाकाऊपासून टिकाऊ’ स्पर्धा

। पनवेल । प्रतिनिधी ।

माझी वसुंधरा अभियान 5.0 अंतर्गत पर्यावरणाचे संवर्धन व संरक्षणाचे महत्व विद्यार्थ्यांमध्ये प्रत्यक्ष कृतीद्वारे बिंबवण्यासाठी पनवेल महानगरपालिकेच्यावतीने विविध उपक्रम राबविण्यात येत आहेत. या अंतर्गत आयुक्त मंगेश चितळे यांच्या मार्गदर्शनाखाली रविवारी (दि.16) डी.डी. विसपुते शिक्षणशास्त्र महाविद्यालयात विविध स्पर्धांचे आयोजन करण्यात आले होते.

माझी वसुंधरा अभियान अंतर्गत पर्यावरणाचे महत्व महाविद्यालयीन विद्यार्थ्यांना समजावे यासाठी उपायुक्त डॉ. वैभव विधाते यांच्या सूचनेनूसार शाळा व महाविद्यालयांमध्ये शिबीरे, व्याख्याने, वक्तृत्व स्पर्धा, पोस्टर स्पर्धा, वृक्षारोपण, प्रश्‍नमंजूषा, चर्चासत्र आणि विविध खेळांचे आयोजन करण्यात येत आहेत. माझी वसुंधरा अभियानातील आकाश, जल, वायू, भूमी, अग्नि या महत्वाच्या घटकांनूसार डी.डी. विसपुते शिक्षणशास्त्र महाविद्यालयात टाकाऊ पासून टिकाऊ स्पर्धेचे आयोजन करण्यात आले होते. या स्पर्धेमध्ये विद्यार्थीनींनी घरातील टाकाऊ पदार्थापासून सुंदर अशा टिकाऊ व शोभेच्या वस्तू तयार केल्या होत्या. या कार्यक्रमाला आदर्श शैक्षणिक समुहाचे अध्यक्ष धनराज विसतुते, महापालिकेच्या आरोग्य विभागाचे प्रमुख अनिल कोकरे, प्राचार्या डॉ. सीमा कांबळे आदी उपस्थित होते.