पाकिस्तानला पाच गडी राखून चारली धूळ;
बेन स्टोक्स, सॅम करन विजयाचे शिल्पकार
| मेलबर्न | वृत्तसंस्था
इंग्लंडने पाकिस्तानचा पाच विकेट्सनी पराभव करत टी-20 विश्वचषका 2022 वर आपली मोहोर उमटविली. इंग्लंडच्या विजयात बेन स्टोक्सने (52) झुंजार अर्धशतकी खेळी करीत संघाला विश्वचषक जिंकून दिला. मात्र, मोक्याच्या क्षणी तीन गडी बाद करणार्या सॅम करनला सामनावीराचा पुरस्कार देऊन गौरविण्यात आले.
तत्पूर्वी, मेलबर्न येथील एमसीजी मैदानावर संपन्न झालेल्या या सामन्यात इंग्लडने नाणेफेक जिंकून प्रथम गोलंदाजीचा निर्णय घेतला. इंग्लंडच्या गोलंदाजांनी आपला गोलंदाजीचा निर्णय सार्थ ठरवत पाकिस्तानला निर्धारित 20 षटकात 8 बाद 137 धावांवर रोखले. फिरकीपटू आदिल राशिद व सॅम करनने शानदार गोलंदाजी केली. पाकिस्तानसाठी बाबर आझम व मोहम्मद रिझवान यांनी 29 धावांची सलामी दिली. रिझवान या सामन्यात केवळ 15 धावा करून बाद झाला. युवा मोहम्मद हॅरिस या सामन्यात अपयशी ठरला. कर्णधार बाबरने 28 चेंडूवर 32 धावांची संथ खेळी केली. शान मसूदने 38 तर शादाब खानने 20 धावांचे योगदान दिले. सॅम करनने 4 षटकात फक्त 12 धावा देत पाकिस्तानचे 3 फलंदाज बाद केले. याचबरोबर आदिल राशिदने बाबर आझम हा इंग्लंडसमोरील मोठा अडसर दूर केला. त्याने 22 धावा देत दोन गडी बाद केले. ख्रिस जॉर्डननेही 2 बळी घेत इंग्लंड संघाला मदत केली. यामुळे पाकिस्तानला 20 षटकात 8 बाद 137 धावांपर्यंतच मजल मारता आली. पाकिस्तानकडून शान मसूदने सर्वाधिक 38 धावा केल्या. तर कर्णधार बाबर आझमने 32 धावा केल्या.
पाकिस्तानने ठेवलेल्या धावांचा पाठलाग करण्यासाठी उतरलेल्या इंग्लंडला पहिल्याच षटकात जबर धक्का बसला. सलामीवीर अॅलेक्स हेल्स शाहिन आफ्रिदीचा शिकार ठरला. चाचपडत खेळणारा फिल सॉल्ट केवळ दहा धावा करत बाद झाला. कर्णधार जोस बटलरने झटपट 26 धावा ठोकल्या. बटलर बाद झाला तेव्हा इंग्लंड संघ संकटात सापडला होता. मात्र, अनुभवी बेन स्टोक्सने हॅरी ब्रुकसह 39 धावांची महत्त्वाची भागीदारी केली. अडखळत खेळत असलेल्या स्टोक्सने खराब चेंडू मिळताच नवाझ याच्यावर हल्ला चढवत इंग्लंडच्या विजयाचे दरवाजे खुले केले. मोईन अलीनेही वसीमला तीन चौकार ठोकत पाकिस्तानला सामन्यातून बाहेर नेले. मोईनने 13 चेंडूंवर 19 धावांचे योगदान दिले. स्टोक्सनेच आपले अर्धशतक पूर्ण करून संघासाठी विजयी धाव काढली.
सॅम करन मालिकावीर
अंतिम सामन्यासह संपूर्ण मालिकेतही अफलातून गोलंदाजी करणार्या सॅम करनला सामनावीर आणि मालिकावीर पुरस्कार देऊन गौरविण्यात आले. सॅमनं 11.38 च्या अॅव्हरेजनं 13 विकेट्स घेतल्या असून, फायनलमध्ये तर 4 ओव्हरमध्ये फक्त 12 रन देत तीन विकेट्स घेतल्या. त्याने एका सामन्यात 5 विकेट्सही घेण्याचा मान मिळवला आहे.