। अलिबाग । विशेष प्रतिनिधी।
आदर्श नागरी सहकारी पतसंस्था मर्यादित, अलिबागच्या रौप्य महोत्सवी वर्षानिमित्त व आदर्श पतसंस्थेच्या मुरुड शाखेच्या तिसर्या वर्धापन दिनानिमित्त मुरुड शाखेत मंगळवारी (दि.13) मोफत नेत्र तपासणी व मोतीबिंदू शस्त्रक्रिया शिबिराचे आयोजन करण्यात आले होते. या शिबिरास उत्तम प्रतिसाद मिळाला.
आदर्श पतसंस्थेची मुरुड शाखा व लायन्स हेल्थ फाउंडेशन चोंढी यांच्या संयुक्त विद्यमाने आयोजित करण्यात आले होते. या शिबिरासाठी 368 जणांनी नोंदणी केली होती. 270 जणांची नेत्र तपासणी करण्यात आली. त्यामधून 66 जणांची आदर्श पतसंस्थे मार्फत मोफत मोतीबिंदू शस्त्रक्रिया करण्यात येणार आहे. शिबिराचे उदघाटन आदर्श पतसंस्थेचे नवनिर्वाचित अध्यक्ष अभिजित पाटील यांच्या हस्ते करण्यात आले. यावेळी आदर्श पतसंस्थेचे संस्थापक सुरेश पाटील, संचालक विलाप सरतांडेल व मुख्य कार्यालय अधिकारी उपस्थित होते.
यावेळी मुरुड शाखेच्या जागेचे मालक धरमचंद जैन, सुवर्णकार नरेंद्र जैन, माजी नगराध्यक्षा कल्पना पाटील, संजीवनी हेल्थचे सामाजिक कार्यकर्ते विजय सुर्वे, संस्थेचे हितचिंतक व सभासद मकरंद कर्णिक, लायन्स हेल्थ फाउंडेशनच्या डॉ.शुभदा कुडतळकर, आर्किटेक्ट योगेश विरकुड, श्रीराम पतसंस्थेचे अध्यक्ष दिलीप जोशी या उपस्थितांचा शाखेचे वतीने सन्मान करण्यात आला. आदर्श पतसंस्था नेहमीच सामाजिक बांधिलकी जपत असून त्याद्वारे आता पर्यंत विविध सामाजिक कार्य केली असून आतापर्यंत सुमारे 400 जणांना मोफत नेत्र बिंदू शस्त्रक्रिये द्वारे दृष्टी देण्याचे काम केले आहे. यापुढे सुद्धा हे सामाजिक काम सुरूच राहील, असे आदर्श पतसंस्थेचे अध्यक्ष अभिजित पाटील यांनी सांगितले.