पनवेलमध्ये तुमच्या कारला जामर लावलाय?…मग काय कराल

| पनवेल | दीपक घरत |

वाहन तळाअभावी पनवेल शहरात येणारे वाहन चालक जागा मिळेल त्या ठिकाणी आपली वाहने उभी करतात. त्यामुळे जागोजागी होणाऱ्या कोंडीचा सामना पनवेलकरांना करावा लागतो. अशा वेळी वाहतूक विभागाचे कर्मचारी पनवेलकरांची कोंडीतून सुटका करण्यासाठी प्रयत्न करतील, अशी अपेक्षा असताना वाहतूक विभागाकडून नेमण्यात आलेले टोविंग कर्मचारी मात्र कारवाईच्या नावावर तोडपाणी करण्यात व्यस्त असल्याचे पहायला मिळत आहेत.

पनवेल वाहतूक विभागात कार्यरत असलेल्या एक महिला कर्मचारी या कामात पुढाकार घेत असल्याने बेकायदेशीरपणे तोडपाणी करणाऱ्या कर्मचाऱ्यांचे फावले आहे. अरुंद रस्ते, वाहन तळाचा अभाव या कारणाने पनवेल शहर आणि वाहतूक कोंडी हे एक प्रकारचे समीकरण ठरले आहे.कोंडीचे हे समीकरण सोडवण्यात पनवेल वाहतूक विभागाला आता पर्यत अपयशच आले आहे. यासाठी अपुऱ्या कर्मचाऱ्यांची संख्या हे कारण दिले जात असल्याने वाहतूक विभागाच्या कर्मचाऱ्यांना मदतनीस देण्याचा प्रस्ताव पालिका प्रशासनाच्या वतीने देण्यात आला होता. मात्र काही कारणास्तव हा प्रस्ताव प्रत्यक्षात येणे शक्य झालेले नाही अशातच मग जागा मिळेल त्या ठिकाणी वाहन उभी करून वाहतूक कोंडीला निमंत्रण देणाऱ्या वाहनचालकांवर कारवाई करण्यासाठी वाहतूक विभागाकडून खाजगी टोविंग व्हॅन ची नेमणूक करण्यात आली आहे.

टोविंग व्हॅनवर कार्यरत असलेले खासगी कर्मचारी शहरातील विविध भागात फिरून रस्त्यावर उभ्या असलेल्या वाहनांवर कारवाई करत आहेत. मात्र कारवाई करण्यासाठी नेमण्यात आलेले हे खासगी कर्मचारीच वाहतूक विभागाच्या कर्मचाऱ्यांना अंधारात ठेऊन परस्पर तोडपाणी करून वाहतूक कोंडीस कारणीभूत ठरलेल्या वाहन चालकांना सोडण्याचे काम करत आहेत.

त्रास सहन करा
वाहन तळ उपलब्ध नसल्याने शहरातील प्रमुख मार्गांवर सम-विषम तारखेनुसार वाहन उभी करण्याची सोय उपलब्ध करून देण्यात आली आहे. मात्र या नंतरही जे वाहन चालक नियमांचे उल्लंघणं करतात अशा चार वाहणावर टोविंग कर्मचारी कारवाई करतात. चारचाकी जामर लावण्याचे काम हे कर्मचारी करतात. जामर वर वाहतूक विभागाचा संपर्क क्रमांक असतो. या क्रमांकावर संपर्क साधला असता वाहतूक विभागात कार्यरत असलेल्या महिला कर्मचाऱ्यांकडून टोविंग व्हॅनवरील खासगी कर्मचाऱ्याला घटनास्थळी पाठवण्यात येते. अशावेळी वाहन चालकाने दंडाची रक्कम भरण्याची तयारी दर्शवल्यास संबंधित कर्मचाऱ्याकडे पावती पुस्तक नसल्याचे कारण देत शहरातील छत्रपती शिवाजी महाराज चौकात येण्यास सांगण्यात येते. मात्र त्याच वेळी तोडपाणी करण्याची तयारी दर्शवल्यास संबंधित कर्मचारीच दंडाच्या रकमेतुन मध्य मार्ग काढून बिना पावती तोडपाणीची रक्कम स्वीकारून जामर काढण्याचे काम करतो.