जिल्हास्तरीय कबड्डी स्पर्धेत ज्ञानशक्ती युवाची उपांत्य फेरीत धडक

। ठाणे । प्रतिनिधी ।
ज्ञानशक्ती युवा संघाने श्री विठ्ठल मंडळ आयोजित जिल्हास्तरीय महिला गट कबड्डी स्पर्धेत उपांत्य फेरीत धडक दिली. तर शिवशंकर, ग्रीफीन्स जिमने प्रथम श्रेणी पुरुष गटात उपांत्यपूर्व फेरी गाठली. ठाणे-लोकमान्य नगर येथील मंडळाच्या क्रीडांगणार सुरू असलेल्या महिलांच्या सामन्यात ज्ञानशक्ती युवा मंडळाने शिवतेज मंडळाचा 29-21 असा पराभव करीत उपांत्य फेरी गाठली. पहिल्या डावात एकमेकांचा अंदाज घेत सावध खेळी करीत ज्ञानशक्ती युवाने 13-10 अशी आघाडी घेण्यात यश मिळविले. दुसर्‍या डावात देखील तोच सावधपणा व संयम कायम राखत 9 गुणांनी विजयाला गवसणी घातली. निधी रांजणे, सानिया गायकवाड यांच्या चढाई-पकडीच्या उत्तम खेळाला या विजयाचे श्रेय जाते. शिवतेजच्या माधुरी गवंडी, पायल जाधव यांचा खेळ संघाचा पराभव टाळण्यास कमी पडला.
प्रथम श्रेणी पुरुषांत शिवशंकरने होतकरूला 27-17 असे नमवित उपांत्यपूर्व फेरी गाठली. पूर्वार्धात अत्यंत चुरशीने खेळल्या गेलेल्या या सामन्यात शिवशंकरने 10-9 अशी निसटती आघाडी घेतली होती. उत्तरार्धात शिवशंकरच्या सुमित साळुंखे, माहीर पांडे, तुषार कोरी यांनी टॉप गिअर टाकत जोशपूर्ण खेळ केला आणि सामना मोठ्या फरकाने आपल्या बाजूने झुकविला. दुसर्‍या सामन्यात ग्रीफीन्स जिम.ने कै. विवेक स्मृतीला 48-29 असे पराभूत करीत उपांत्यपूर्व फेरीत धडक दिली. मध्यांतराला 26-14अशी आघाडी विजयी संघाकडे होती. कै. विवेकस्मृतीकडून श्रीकांत व सतीश या म्हात्रे बंधुना या सामन्यात आपला प्रभाव पाडता आला नाही.