अलिबागमध्ये आज ‘श्रावण सृजन’ चित्रलेखा पाटील यांच्या हस्ते उद्घाटन

। अलिबाग । प्रतिनिधी ।

श्रावण सृजन या कार्यक्रमाच्या माध्यमातून महिलांनी बनविलेल्या विविध हस्तकला व कलाकुसारीच्या वस्तूंचे दोन दिवसांचे प्रदर्शन दि. 5 व 6 ऑगस्ट रोजी अलिबाग येथील भाग्यलक्ष्मी हॉलमध्ये भरविण्यात येणार आहे. या प्रदर्शनाचे उद्घाटन रायगड जिल्हा शेकाप महिला आघाडी प्रमुख चित्रलेखा पाटील यांच्या हस्ते होणार आहे. या कार्यक्रमाचे माध्यम प्रायोजन कृषीवल आहे.

या कार्यक्रमास माजी नगराध्यक्ष प्रशांत नाईक, उपनगराध्यक्षा अ‍ॅड. मानसी म्हात्रे, माजी जि.प. सदस्या प्रयदर्शनी पाटील, माजी राजिप सदस्या, चेंढरे सरपंच स्वाती पाटील, अलिबाग कापड व्यापारी असो.चे अध्यक्ष जयंती, शहा, उद्योजिक वीणा म्हामुणकर उपस्थित राहणार आहेत. यानिमित्ताने श्रावण, पाऊस या विषयावर काव्य लेखन स्पर्धा, तर सणांचे पारंपरिक नैवेद्याचे पदार्थ या विषयावर पाक कला स्पर्धा होणार आहे.

महिलांनी तयार केलेल्या वस्तूंना तसेच व्यावसायिक म्हणून विकसित होऊ पाहात असलेल्या महिलांना हक्काचे व्यासपीठ मिळावे, या उद्देशाने प्रदर्शनाचे आयोजन करण्यात आले आहे. या कार्यक्रमाचे आयोजक आम्ही अलिबागच्या उद्योगिनी हा व्हॉट्सअ‍ॅप ग्रुप हा आहे.

गृहसजावटीच्या वस्तू, खाद्यपदार्थ, पर्सेस, दागदागिने, फोटोफ्रेम, मेणबत्त्या, हस्तकलेच्या वस्तू तसेच आगामी काळात येणार्‍या रक्षाबंधन, गणेशोत्सव आदी सणांच्या पार्श्‍वभूमीवर विविध उपयुक्त वस्तूंचा समावेश या प्रदर्शनात करण्यात येणार आहे. प्रत्येक उद्योजक महिलेला आपला माल याठिकाणी विकता येणार असून, त्यामाध्यमातून व्यवसाय विस्तारण्यास नक्कीच वाव मिळेल, अशी खात्री आम्ही अलिबाग उद्योगिनी या गृपला आहे.

आम्ही अलिबागच्या उद्योगिनी हे महिला उद्योजकांना एकत्र आणणारं एक हक्काचं व्यासपीठ आहे. या ग्रुपच्या माध्यमातून आतापर्यंत अलिबाग तालुक्यातील जवळपास 350 हून अधिक महिला उद्योजिकांना एकत्र आणण्यात यश आले असून, त्याचा त्यांना आपल्या व्यवसायासाठी फायदा झाला आहे. या ग्रुपचे हे पहिलेच वर्ष असून, सुरुवात होऊन तीनच महिने झाले आहेत.