फ्लू लसीकरणाला प्राधान्य

सौम्य तापातही लस घेता येणार

। पनवेल । खास प्रतिनिधी ।

प्रौढांमधील फ्लू लसीकरणाबाबत जनजागृती वाढविण्यासाठी भारतीय वैद्यकीय संघटना आणि अॅबॉट यांच्या संयुक्त विद्यमाने 21 ते 27 सप्टेंबरदरम्यान ‘भारतीय लसीकरण सप्ताह’ आयोजित करण्यात आला आहे. फ्लूच्या लसीकरणाचे महत्त्व पटवून देण्यासोबतच ताप असताना लसीकरण करावे की नाही, याबाबत नागरिकांमध्ये असलेला संभ्रम दूर करण्यावर या उपक्रमात भर देण्यात आला आहे. भारतात लसीकरणाचा भर पारंपरिकरीत्या बालकांवर राहिला असून प्रौढांचे लसीकरण तुलनेने दुर्लक्षित राहिले आहे. राष्ट्रीय नमुना सर्वेक्षणानुसार, देशातील 18 वर्षांवरील केवळ 1.98 टक्के प्रौढांनी उपलब्ध लसी घेतल्या आहेत, तर 60 वर्षांवरील नागरिकांमध्ये हे प्रमाण केवळ 0.40 टक्के आहे. 2026 मधील एका अभ्यासानुसार, 60 वर्षांवरील केवळ 19.7 टक्के ज्येष्ठांना इन्फ्लूएंझाबाबत माहिती होती आणि केवळ 1.4 टक्के ज्येष्ठांनी फ्लूची लस घेतली होती.

सौम्य ताप असल्यास फ्लू लसीकरण पुढे ढकलण्याची गरज नसल्याचे मार्गदर्शन करण्यात आले आहे. मात्र, मध्यम ते गंभीर आजार असल्यास रुग्ण पूर्णपणे बरा होईपर्यंत लसीकरण पुढे ढकलले जाऊ शकते. अशा वेळी डॉक्टरांनी पुढील तपासणी किंवा लसीकरणासाठी निश्चित तारीख देणे आवश्यक असल्याचे सांगण्यात आले आहे. लहान मुले, ज्येष्ठ नागरिक, गर्भवती महिला, दीर्घकालीन आजार असलेले रुग्ण आणि आरोग्य कर्मचाऱ्यांसाठी फ्लूची लस विशेष महत्त्वाची असल्याचे तज्ज्ञांनी नमूद केले आहे. गर्भधारणेच्या कोणत्याही टप्प्यावर फ्लूची लस घेणे सुरक्षित मानले जाते.

भारतीय वैद्यकीय संघटनेचे राष्ट्रीय अध्यक्ष डॉ. अनिलकुमार जे. नायक आणि अॅबॉटचे प्रादेशिक वैद्यकीय संचालक डॉ. पराग शेठ यांनी तापाबाबतच्या अनावश्यक चिंतेमुळे लसीकरणाला विलंब होऊ नये, असे स्पष्ट केले. वेळेवर लसीकरण करून उच्च धोक्याच्या गटातील नागरिकांचे संरक्षण करण्याची गरज त्यांनी व्यक्त केली.