एमएमआरमध्ये आंतरराष्ट्रीय शैक्षणिक केंद्र

। मुंबई । प्रतिनिधी ।

मुंबई महानगर प्रदेश (एमएमआर) ग्रोथ हबअंतर्गत एमएमआरला आंतरराष्ट्रीय दर्जाचे आर्थिक विकास केंद्र बनविले जाणार आहे. यासाठी विविध प्रकल्प राबविण्यात येणार आहेत. एमएमआरला आघाडीचे, आंतरराष्ट्रीय दर्जाचे शैक्षणिक केंद्र बनविण्याचेही उद्दिष्ट ग्रोथ हबअंतर्गत ठेवण्यात आले आहे.
ग्रोथ हबच्या आराखड्यानुसार अटल सेतू प्रभावित क्षेत्रातील नवनगरात अर्थात तिसर्‍या मुंबईत आणि नैना प्रकल्पात अंदाजे 100 हेक्टर जागेवर प्रत्येकी एक अशा दोन एज्युसिटी 2030 पर्यंत उभारण्यात येणार आहेत. यात 15 अभियांत्रिकी महाविद्यालये, दोन किंवा तीन विधि महाविद्यालये, पाच किंवा सहा वैद्याकीय, तसेच फार्मसी महाविद्यालयांसह इतर महाविद्यालयांचा समावेश असणार आहे.

महत्त्वाचे म्हणजे वडाळ्यातील आंतरराष्ट्रीय दर्जाच्या व्यापार केंद्रात एक व्यवस्थापन अभ्यासक्रम (एमबीए) महाविद्यालयाचेही नियोजन करण्यात येणार आहे. त्याचवेळी देश-विदेशातील 20 हजार विद्यार्थ्यांना दरवर्षी उच्च शिक्षणासाठी एमएमआरकडे आकर्षित करण्याचेही उद्दिष्ट ठेवण्यात आले आहे.

नैनामध्ये एक एज्युसिटी
ग्रोथ हबमध्ये एमएमआरला आघाडीचे, आंतरराष्ट्रीय दर्जाचे शैक्षणिक केंद्र म्हणूनही विकसित केले जाणार असल्याचे सूत्रांनी सांगितले. त्याचाच एक भाग म्हणून तिसर्‍या मुंबईत एक आणि नैनामध्ये एक एज्युसिटी विकसित केली जाणार आहे. अंदाजे 100 हेक्टर जागेवर ही एज्युसिटी असणार आहे. यात महाविद्यालयांसह विद्यार्थी वसतीगृह, खेळाची मैदाने, विद्यार्थ्यांसाठी आवश्यक दुकाने आणि इतर सुविधांचाही समावेश आहे.