मतदानासाठी भरपगारी रजा

जिल्हा निवडणूक अधिकारी किशन जावळे यांचे आदेश

| रायगड | खास प्रतिनिधी |

लोकसभा मतदारसंघात क्षेत्रातील मतदार यादीत नाव असलेल्या प्रत्येक मतदाराला मतदार करता यावे यासाठी मंगळवार, (दि.7) मे रोजी भरपगारी रजा देण्यात यावी, असे आदेश जिल्हाधिकारी तथा जिल्हा निवडणूक अधिकारी किशन जावळे यांनी दिले आहेत.

तिसर्‍या टप्प्यात मंगळवारी (दि.7) मे रोजी मतदान होणार आहे. जिल्हाधिकारी तथा जिल्हा निवडणूक अधिकारी यांनी जिल्ह्यातील सर्व आस्थापना प्रमुखांना त्यांच्या अधिपत्याखालील सर्व अधिकारी/कर्मचारी/रोजंदारी कर्मचारी यांना (दि.7) मे रोजी भरपगारी रजा मंजूर करण्याचे आदेश पुढील शर्ती/अटीस अधिन राहून देय आहे. सदर आदेश हा शासकीय आस्थापना/खासगी आस्थापना/रोजंदारीवरील कर्मचारी आस्थापना/दुकाने/कंपनी/अशा सर्व आस्थापनांना लागू आहे. ज्या आस्थापनांमध्ये उक्त कामगारांचे अनुपस्थितीमुळे उक्त आस्थापनांचा धोका निर्माण होऊ शकतो अथवा मोठ्या प्रमाणात तोटा होऊ शकतो अशा कर्मचार्‍यांसाठी लागू नाही. सदर आदेशाचे पालन न करणारे आस्थापना प्रमुख हे कारवाईस पात्र राहतील. आदेश हा अन्य जिल्ह्यात काम करणार्‍या परंतु जिल्ह्याच्या क्षेत्रातील मतदार यादीत नाव असलेल्या मतदारांच्या आस्थापना प्रमुखांनाही लागू होत आहे, असेही आदेशात म्हटले आहे.