। माणगांव । प्रतिनिधी ।
महामहिम राज्यपाल तथा विद्यापीठाचे कुलपती यांच्या कार्यालयामार्फत महाराष्ट्र राज्य आंतर विद्यापीठ अविष्कार स्पर्धेचे आयोजन लोणेरे येथील डॉ. बाबासाहेब आंबेडकर तंत्रशास्त्र विद्यापीठात दि.12 ते 15 जानेवारी दरम्यान करण्यात येणार आहे. तसेच, आविष्कार ही राज्यव्यापी आंतर-विद्यापीठ संशोधनावर आधारित स्पर्धा असून या स्पर्धेमध्ये महाराष्ट्रातील एकूण 26 विद्यापीठांचा समावेश आहे, अशी माहिती लोणेरे विद्यापीठात शनिवारी (दि.11) घेण्यात आलेल्या पत्रकार परिषदेत बोलताना कुलगुरू डॉ. कारभारी काळे यांनी दिली आहे.
ही स्पर्धा मानवता माषा आणि ललितकथा, वाणिज्य व्यवस्थापन आणि कायदा, शुष्ट विज्ञान अभियांत्रिकी आणि तंत्रज्ञान, औषधे आणि फार्मसी, कृषी आणि पशुसंवर्धन अशा सहा विविध श्रेणीमध्ये आयोजित करण्यात आली आहे. आविष्कार या स्पर्धेसाठी राज्यपाल कार्यालय, राजभवन यांनी नियुक्त केलेल्या निरीक्षण समितीच्या मार्गदर्शनाखाली दहा निरीक्षक निवडलेले असतात तसेच राष्ट्रीय स्तरावरील शास्त्रज्ञ, संशोधक व इतर मान्यवर यांचा परीक्षक म्हणून सहभाग असतो. विद्यापीठाचे कुलगुरु कर्नल प्राध्यापक डॉ. कारभारी काळे यांच्या मार्गदर्शनानुसार व निर्देशानुसार आविष्कार या स्पर्धेची यशस्वी आयोजनाची तयारी सुरु आहे. या स्पर्धेचा मूळ उद्देश विद्यार्थ्यांमध्ये नाविन्यपूर्ण वैज्ञानिक दृष्टिकोनाची जोपासना करणे, तसेच विद्यार्थ्यांना संशोधनासाठी प्राथमिक संधी उपलब्ध करुन देणे, त्याचबरोबर त्यांच्यामध्ये स्पर्धात्मकता निर्माण करणे हे आहेत.