माथेरानच्या प्रस्तावित रोपवे प्रकल्पास हिरवा कंदील

स्थानिकांमध्ये समाधानाचे वातावरण

| माथेरान | वार्ताहर |

नेरळ-माथेरान एकमेव मार्ग असल्याने पर्यायी व्यवस्था उपलब्ध व्हावी ही स्थानिकांची अनेक वर्षांपासूनची मागणी होती, त्यातच रोपवेचा प्रस्तावित प्रकल्पाला राज्य शासनाकडून नुकताच हिरवा कंदील मिळाल्यामुळे सर्वत्र आनंदाचे वातावरण दिसून येत आहे.

केंद्राच्या राष्ट्रीय राजमार्ग लॉजिस्टिक व्यवस्थापन लि. (एनएचएलएमएल) आणि राज्य सरकारकडून पर्वतमाला परीयोजनेंतर्गत एकूण 45 रोपवेची कामे हाती घेण्यात आली आहेत. नुकत्याच झालेल्या मंत्रिमंडळ बैठकीत त्याला मान्यताही देण्यात आली आहे. सरकारकडून 16 तर एनएचएलएमएलकडून 29 रोपवेची उभारणी करण्यात येणार आहे. यातील कोकण विभागात 11, तर पुणे विभागात 19 रोपवे असतील. रोपवेची उभारणी करताना विविध पर्यायांचा वापर करण्यात येणार असून, त्यात एनएचएलएमएलला जागा उपलब्ध करून देणे आणि त्यात समभाग घेऊन महसूल मिळवणे राज्य सरकारकडून खासगी सार्वजनिक प्रकल्पाच्या आधारावर उभारणी करणे आणि बांधा, वापरा हस्तांतरित करा या मार्गांचा अवलंब करण्यात येणार आहे.

कोकण विभागातील माथेरानचा प्रस्तावित रोपवे प्रकल्प एमएमआरडीएच्या माध्यमातून पूर्णत्वास जाण्याची शक्यता आहे. त्यामुळे लवकरच हा महत्त्वाकांक्षी प्रकल्प पूर्ण होऊन पर्यटनवाढीसाठी केंद्रबिंदू ठरणार असल्याने या रोपवेची कामे युद्धपातळीवर मार्गी लावावीत, अशी मागणी जोर धरू लागली आहे.

माथेरानचा रोपवे पूर्ण झाल्यास तो आशिया खंडातील सर्वात लांब पल्ल्याचा रोपवे ठरू शकतो. माथेरानच्या रोपवेला परवानगी मिळून दहा वर्षे झालेली आहेत. तसेच सर्वोच्च न्यायालयाने परवानगी देऊन जवळपास आठ वर्षे पूर्ण झालेली आहेत. हा प्रकल्प रखडलेला आहे, कोणती कंपनी फंडिंग करायला पुढे आले नाही. त्यामुळे सरकारनेच हा प्रोजेक्ट हाती घेऊन माथेरान पर्यायी व्यवस्था उपलब्ध करून द्यावी.

– मनोज खेडकर, माजी नगराध्यक्ष, माथेरान