| मुरुड। वार्ताहर ।
मुरुड तालुक्यातील फणसाड अभयारण्यात वन्यजीवांप्रमाणेच आता पक्ष्यांची संख्या वृद्धिंगत होत आहे. आता शासन पातळीवर याची नोंद घेण्यात आली असून नुकत्याच केलेल्या पाहणीत 190 पक्ष्यांच्या जातींसोबतच माशीमार खाटीक, बेडूकमुखी, कोतवाल, कोकीळ, टिकेलचा कस्तुर, विविध प्रजातींची घुबड, निळ्या चष्म्याच्या मुंगश्या, मलबारी कवड्या, धनेश, रंगीत तुतारी, कालवफोड्या, तिरचिमणी, कस्तुर इत्यादी दुर्मिळ प्रजातींची नव्याने नोंद करण्यात आली आहे. सुमारे 54 किलोमीटर चौरस परिक्षेत्रात हे अभयारण्य विस्तारलेले आहे. याठिकाणी पक्ष्यांच्या व्यतिरिक्त 50 प्रजातींची फुलपाखरे, 18 प्रजातींचे सरपटणारे प्राणी, 10 उभयचर प्रजाती, 4 कोळी प्रजाती, 23 सस्तन प्रजातींचे प्राण्यांची नोंद करण्यात आली आहे. त्यामुळे या अभयारण्यात आता वन्यजीवांप्रमाणेच पक्ष्यांची संख्यासुद्धा वृद्धिंगत झाल्याने वन्यजीवप्रमींप्रमाणेच पक्षीप्रमीसुद्धा भेटी देऊ लागल्याने ऐन दिवाळी सुट्टीत येथे गर्दी पहावयास मिळत आहे. मुरुड तालुक्यातील फणसाड अभयारण्यात रानगव्यांची संख्या वाढली आहे. पूर्वी या प्राण्यांची संख्या आठ होती परंतु नवीन आकडेवारीनुसार हीच संख्या 16च्या वर गेली आहे. तसेच घुबड, तुरवाला सर्पगरुड, ससाणा, सफेद पाठीची गिधाडे, सातभाई, बुलबुल, हळद्या तांबट, खंड्या, खाटीक, सुभग, नीलपंख, स्वर्गीय नर्तक, सुतार, कोकिळ यांसारखे रंगीबेरंगी पक्षी येथे वास्तव्यास आहेत.
सुट्टीच्या मोसमात पाहण्याच संधी
जंगलाच्या चौफेर बाजूस हे रानगवे आता दिसून येत आहेत. तसेच येथे रानकुत्रासुद्धा आढळून आला आहे. वन्यजीवांप्रमाणे पक्ष्यांच्या विविध जाती वाढल्याने येथे सुट्टीच्या मोसमात पर्यटकांची गर्दी वाढली आहे.
औषधी वनस्पतीही मोठ्या प्रमाणात
मुंबईपासून 160 किलोमीटर अंतरावर पनवेल, पेण व अलिबाग मार्गावर विस्तीर्ण असे फणसाड अभ्यारण्य म्हणजे निसर्गाचे एक वरदान आहे. या अभयारण्यात साग व निलगिरीची उंच भली मोठी झाडे असल्याने कडक उन्हातही दाट सावली या भागात आढळून येते. ऐन, किजल, जांभूळ, हेड, कुडा, गेळ, अंजली, कांचन, सावर याचबरोबर सीता अशोक, सर्पगंधा, रानतुळस, कुर्डू, उक्षी या औषधी वनस्पतीसुद्धा या ठिकाणी आढळून येतात.