। नेरळ । प्रतिनिधी ।
माथेरान शहरात कचरा जळण्यास मनाई आहे, तसेच इतरत्र कचरा साठवून ठेवण्यास आणि कचरा टाकण्यास मनाई आहे. मात्र माथेरान पालिकेत रस्त्यांच्या कामासाठी आणलेल्या सिमेंटच्या रिकाम्या पिशव्या आर्टिस्ट पॉइंट येथे साठवून ठेवण्यात आल्या होत्या. दोन वर्षापासून पडून असलेल्या पिशव्या उचलण्यात आल्या नसल्याने अखेर त्या पिशव्यांना आग लागली आणि वृक्षसंपदेचे मोठी हानी झाली. या प्रकरणी पालिका प्लास्टिक पिशव्या साठवून ठेवणार्या संबंधित ठेकेदारावर कोणती कार्यवाही करणार याकडे लक्ष लागून राहिले आहे.
माथेरान शहरातील आर्टिस्ट पॉइंट येथील कोपर्यावर त्या रिकाम्या पिशव्या टाकून देण्यात आल्या होत्या. त्या रिकाम्या पिशव्या दोन वर्षे तेथेच पडून होत्या आणि अखेर त्या पिशव्यांना अज्ञात व्यक्तीने आग लावली.त्या आगीमुळे आर्टिस्ट पॉइंट भागातील अनेक झाडांना आगीने आपल्या भक्ष्यस्थानी आणलेे. या आगीमुळे आजूबाजूची झाडे जळून गेली आहेत. त्या प्लास्टिक पिशव्या तेथे टाकण्यात आल्याने पर्यावरणाचादेखील र्हास झाला आहे. आग लागल्याची माहिती मिळताच माथेरान पालिकेचे अग्निशमन केंद्र तत्काळ तेथे दाखल झाले. त्यानंतर आगीवर नियंत्रण मिळविण्यात यश आले असलेतरी आजूबाजूची झाडे जळून खाक झाली. या प्रकरणी माथेरान नगरपरिषद संबंधित ठेकेदार कंपनीवर कोणती कारवाई करणार याकडे लक्ष लागून राहिले आहे. राकेश कोकले हे आपल्या सहकार्यासह गेली दोन वर्षे माथेरानच्या जंगलात फिरून प्लास्टिक पिशव्या जंगलातून दरीमधून बाहेर काढण्याचे काम करीत आहेत. दुसरीकडे दोन वर्षे पिशव्या पडून राहिल्याने त्या ठिकाणी नवीन झाडे उगविण्याची प्रक्रिया पुढे जात नाहीत. यामुळे जंगलाचा र्हास होत असल्याचा आरोप कोकाले यांनी केला.