। मुरुड । वार्ताहर ।
मुरुड बाजारपेठ येथील पाडगे डेअरीजवळ असणारा विद्युत पोल व नगरपरिषदेची पाण्याची टाकी येथे असणारा पोल व त्यावरील क्लॅम,टूपिन व फोरपीन हे खराब होऊसुद्धा या सर्व साहित्याला तारांनी बांधून जाबवबदारी पूर्ण केल्यासारखी महावितरणचे कर्मचारी वागत आहेत .वास्तविक पहाता हे खूप भयावह असून रस्त्यावर चालणार्यांना मोठा धोका होणार वेळीच तातडीने या दोन पोल वरील दुरुस्ती करून द्यावी अशी मागणी आशिष बागडे यांनी केली आहे.
याबाबत त्यांनी स्थानिक पत्रकारांशी संपर्क साधून हे दोन्ही पोल दाखवून देऊन याबाबतचा धोका सुद्धा दाखवून दिला.महावितरणाचे अधिकारी याना सुद्धा बोलावून सदरील परस्थिती दाखवून दिली.यावेळी शहर अभियंता राठोरा याना सुद्धा या पोलची पाहणी केली असून सदरील पोलवरील दुरुस्तीकडे दुर्लक्ष करीत असल्याचा आक्षेप आशिष बागडे यांनी केला आहे.गावात अनेक ठिकाणी अशीच परस्थिती असून मुरुड शहरातील सर्व पोलची प्रत्यक्ष पाहणी होऊन दुरुस्ती न केल्यामुळे मुरुड शहरातील वीज हि वारंवार जात असल्याचा आक्षेप बागडे यांनी घेतला आहे.बाजारपेठ येथील पोल वरील दुरुस्त्या त्वरित करून मिळावी यासाठी त्यांनी अधीक्षक अभियंता पेण यांच्याशी भ्रमणध्वनी वरून संपर्क करून पोल बाबत गार्हाणे मांडले आहे.
याबाबत उप मुख्य कार्यकारी अभियंता महादेव दातीर यांनी सदरच्या पोल ची पाहणी करून ताबतोब दुरुस्तीचे आदेश देणार असल्याचे सांगितले.