पर्यटन संचालनालयाचे कोलाड पोलिसांना पत्र; चौकशी करून कारवाईचे निर्देश
| रोहा | प्रतिनिधी |
कोलाड परिसरातील धगडवाडी येथील रॉकविल रिसॉर्टमध्ये रिव्हर राफ्टिंगदरम्यान मुंबईतील पर्यटकाचा मृत्यू झाल्याच्या प्रकरणाला आता गंभीर वळण मिळाले आहे. संबंधित रॉकविल रिसॉर्टला वॉटर स्पोर्ट्स अथवा रिव्हर राफ्टिंग उपक्रमासाठी पर्यटन संचालनालयाकडून कोणतीही परवानगी किंवा मान्यता देण्यात आलेली नसल्याचे लेखी स्वरूपात स्पष्ट झाले आहे. या प्रकरणाची चौकशी करून योग्य ती कार्यवाही करावी, असे पर्यटन संचालनालयाच्या कोकण विभागीय कार्यालयाने कोलाड पोलिसांना पत्राद्वारे कळविले आहे.
कोलाड परिसरात रिव्हर राफ्टिंगदरम्यान मनोज अमर नाथ या पर्यटकाचा मृत्यू झाल्यानंतर या घटनेबाबत पर्यटन विभागाकडे तक्रार दाखल करण्यात आली होती. या तक्रारीची दखल घेत पर्यटन विभागाने 4 ऑगस्ट 2026 रोजी कोलाड पोलिसांना पत्र पाठविले आहे. तक्रारीनुसार, 11 जुलै 2026 रोजी धगडवाडी येथील रॉकविल रिसॉर्टमध्ये रिव्हर राफ्टिंगदरम्यान मनोज अमर नाथ यांचा मृत्यू झाला. या घटनेच्या पार्श्वभूमीवर पर्यटन संचालनालयाने संबंधित रिसॉर्टला वॉटर स्पोर्ट्स किंवा रिव्हर राफ्टिंग उपक्रम चालविण्यासाठी आपल्या विभागाकडून कोणतीही परवानगी अथवा मान्यता देण्यात आलेली नसल्याचे स्पष्ट केले आहे.
पर्यटन संचालनालयाकडूनच परवानगी नसल्याचे स्पष्ट झाल्याने आता रिव्हर राफ्टिंगचा हा उपक्रम नेमका कोणत्या परवानगीच्या आधारे सुरू होता, असा गंभीर प्रश्न निर्माण झाला आहे. याशिवाय संबंधित उपक्रमासाठी इतर शासकीय विभागांची आवश्यक परवानगी घेण्यात आली होती का, सुरक्षा नियमांचे पालन करण्यात आले होते का आणि पर्यटकांच्या सुरक्षेसाठी आवश्यक साधने व प्रशिक्षित कर्मचारी उपलब्ध होते का, याचीही चौकशी होणे गरजेचे आहे.
दरम्यान, पर्यटनासाठी कोलाड परिसराची वाढती ओळख पाहता साहसी पर्यटनाच्या नावाखाली नियम आणि सुरक्षेला बगल दिली जात नाही ना, याची तपासणी करण्याची गरज आहे. एका पर्यटकाचा जीव गेल्यानंतर परवानगीचा मुद्दा समोर येत असल्याने प्रशासनाच्या देखरेखीवरही प्रश्नचिन्ह निर्माण झाले आहे. आता या प्रकरणातील चौकशीतून सत्य बाहेर येऊन दोषींवर कारवाई होते का, याकडे स्थानिक नागरिक आणि पर्यटकांचे लक्ष लागले आहे.
मृत्यूची जबाबदारी कोणाची?
रिव्हर राफ्टिंगसारख्या साहसी पर्यटन उपक्रमात पर्यटकांच्या सुरक्षेला सर्वोच्च प्राधान्य असणे अपेक्षित आहे. मात्र, ज्या उपक्रमासाठी पर्यटन संचालनालयाची कोणतीही मान्यता नसल्याचे आता समोर आले आहे, त्या उपक्रमाचे संचालन कशाच्या आधारावर केले जात होते, याचा तपास पोलिसांनी करणे आवश्यक आहे. या दुर्घटनेनंतर केवळ अपघात म्हणून प्रकरणाकडे न पाहता रिसॉर्टचा रिव्हर राफ्टिंग व्यवसाय, त्यासाठी घेतलेल्या परवानग्या, सुरक्षा व्यवस्था, प्रशिक्षित मनुष्यबळ आणि संबंधित यंत्रणांकडून करण्यात आलेल्या तपासण्या यांचीही चौकशी होण्याची गरज आहे.
पर्यटन विभागाने पोलिसांकडे सोपविली जबाबदारी
तक्रारीच्या अनुषंगाने पर्यटन संचालनालयाने कोलाड पोलिसांना प्रकरणाची चौकशी करून योग्य ती कार्यवाही करण्याचे निर्देश दिले आहेत. त्यामुळे पोलिसांच्या तपासात रिव्हर राफ्टिंग उपक्रमाचे संचालन नेमके कोणाच्या परवानगीने सुरू होते आणि या दुर्घटनेला जबाबदार कोण, याचा उलगडा होणे अपेक्षित आहे.