दिवाळीच्या फराळामुळे महसूल विभागाला पेंग; रोह्यात रेती उत्खनन जोरात

। रोहा । प्रतिनिधी ।
तालुक्यातील रेती उत्खननात महसूल विभागाची भूमिका नेहमीच स्लीपिंग पार्टनर म्हणून राहिली आहे. दिवाळीच्या सलग सुट्ट्यांचा अंदाज घेत वाळू उत्खननात अग्रेसर असणार्‍या कुंडलिका उजव्या तीरावरील एका नेत्याने महसूल विभागाला दिवाळी पूर्वीच फराळाची पाकिटे दिली.
या फराळाच्या पाकिटांमुळे रोह्यातील महसूल विभागाला पेंग आल्याने तालुक्यातील गोफण खाडीत राजरोसपणे रेती उत्खनन सुरू असल्याची माहिती स्थानिकांनी दिली आहे.
अधिकृतरीत्या रेती उत्खनन सुरू झाल्यास आपल्या पदरात काही विशेष पडणार नाही. पण अनधिकृत रेती उत्खनन सुरू राहिल्यास स्लीपिंग पार्टनर म्हणून आपल्या पदरात चांगला लाभ मिळतो हे माहित असल्याने महसूल विभागाकडून रेती उत्खननाबाबत ठोस भूमिका घेतल्याचे कधीच दिसून येत नाही.
कुंडलिका खाडीतून अवैध मार्गाने उत्खनन करण्यात आलेली वाळू बिनदिक्कतपणे रात्रीच्या अंधारात तालुक्याच्या बाहेरील विक्रेत्यांना पोहचवली जात आहे. पण ही वाहतूक महसूल व पोलीस प्रशासन यापैकी कोणाच्याही नजरेला दिसत नसल्याचे चित्र आहे.
रेती उत्खननाबाबत तक्रारी आल्या किंवा बातम्या प्रसिद्ध झाल्या नंतर थातुरमातुर कारवाई करण्याचे नाटक करण्यात येते. जागेवर काही माल मिळून आला तरी त्याची बेवारस म्हणून पंचनामा करून नोंद होते .काही महिन्यांनी हा माल पुन्हा नाहीसा होतो. आणि पुन्हा वळणाचे पाणी वळणावरच. कारण कारवाई करण्याचे अधिकार असणारेच या व्यवसायात स्लीपिंग पार्टनर असल्याने बेकायदेशीर वाळू उत्खनन जोरात असल्याची माहिती स्थानिकांनी दिली आहे.
या व्यवसायात भांडवल गुंतवणूक करणार्‍या मंडळींचा फायदा होतो का तोटा हा जरी संशोधनाचा विषय असला तरी व्यवसायात स्लीपिंग पार्टनर असणार्‍या प्रशासनाचा मात्र फायदाच होत असल्याने दिवाळीच्या शुभ मुहूर्तावर फराळाची पाकिटे मिळाल्याने प्रशासनाने मात्र झोप आल्याचे सोंग घेतले असल्याचे दिसून येत आहे. या खाडीतून दररोज सुमारे 100 ब्रास रेती उत्खनन होत असल्याची माहिती सुत्रांकडून मिळत आहे.