सांडशी खांडपे रस्त्याचे काम बंद; माजी जि.प.उपाध्यक्षांचे उपोषण

| नेरळ | प्रतिनिधी |

कर्जत तालुक्यातील सांडशी – खांडपे या रस्त्याचे काम 2019 पासून सुरू झाले असून अर्धवट अवस्थेत आहे. मात्र तीन वर्षात रस्त्याचे काम पूर्ण होत नसल्याने आज त्या भागातील ग्रामस्थांनी रस्त्याच्या कामाविरोधात रस्त्यावर उतरून आंदोलन केले. दरम्यान, रस्त्याचे काम उद्या सुरू झाले नाही तर 7 जानेवारी पासूनच स्थानिक ग्रामस्थांसह उपोषण करण्याचा निर्धार माजी जि.प.उपाध्यक्ष सुधारक घारे यानी केला आहे.

तालुक्यातील पाच रस्त्यांच्या कामांना मुख्यमंत्री ग्रामसडक योजनेमधून मंजुरी देण्यात आली होती. त्यात खांडपे तिवणे सांडशी या सव्वा चार किलोमीटर रस्त्याच्या कामाचा समावेश होता. 2019 मध्ये त्या सर्व कामांना मंजुरी देण्यात आली होती, मात्र दोन कोटी 62 लाख रुपये खर्चाच्या या रस्त्याच्या कामाचे कार्यादेश ग्रामीण विकास यंत्रणेकडून 2021 मध्ये देण्यात आले. सदर कामाचा ठेका नवी मुंबई येथील श्री सिद्धिविनायक कन्स्ट्रकशन या कंपनीने घेतला होता. मात्र संबंधित ठेकेदार कंपनीने आणखी एक सब ठेकेदार नेमत रस्त्याच्या कामाची जबाबदारी स्थानिक दुसर्‍या एका अनुभव नसलेल्या ठेकेदाराकडे दिली. त्यानुसार तेथे रस्त्याचे काम करणार्‍या ठेकेदाराने खडीकरण आणि मजबुतीकरण करण्यासाठी खांडपे सांडशी या रस्त्याचा जुना भाग जेसीबी मशीन द्वारे खोदून काढला. त्यांनतर त्या रस्त्याचे काम करणारा ठेकेदार गायब झाला आहे तो अद्याप रस्त्याचे काम पुढे नेण्यासाठी उगवलेला नाही.

खांडपे तिवणे सांडशी या रस्त्याचे मजबुतीकरण करण्यासाठी खोदलेला रस्त्याचे काम पुढे केले गेले नाही आणि त्याचा परिणाम रस्त्यातून कोणतेही वाहन नेता येत नाही. त्या ठिकाणी खोदलेल्या रस्त्यामध्ये सलग दोन वर्षे पावसाळा होऊन गेला असून तेथून कोणतेही वाहन जाऊ शकत नसल्याने स्थानिक गेली दोन वर्षे खड्ड्यातून प्रवास करीत आहेत. स्थानिक ग्रामस्थ आणि रायगड जिल्हा परिषदेचे तत्कालीन उपाध्यक्ष सुधाकर घारे यांनी ग्रामीण विकास यंत्रणेकडून सातत्याने पाठपुरावा सुरू ठेवला होता. मात्र रस्त्याचे काम पुढे जात नसल्याने अखेर त्या भागातील ग्रामस्थांचा संयम सुटला आणि आज 1 जानेवारी रोजी त्या भागातील ग्रामस्थ रस्त्यावर उतरले. जिल्हा परिषदेचे माजी उपाध्यक्ष सुधाकर घारे यांच्या नेतृत्वाखाली ग्रामस्थांनी रस्त्यावर उतरून आंदोलन केले. मात्र उद्या पर्यंत रस्त्याचे काम सुरू झाले नाही तर मात्र सात जानेवारी रोजी कर्जत तहसील कार्यालय येथे खांडपे, तिवणे, सांडशी या गावातील ग्रामस्थ उपोषणाला बसणार आहेत. स्वतः सुधाकर घारे हे देखील त्या ग्रामस्थ यांच्यासोबत उपोषण करणार असून रस्त्याच्या कामासाठी ग्रामीण विकास यंत्रणा आता कोणती भूमिका घेणार? याकडे लक्ष लागून राहिले आहे.