धक्कादायक! पोलीस शिपायाची स्वतःवर गोळ्या झाडून आत्महत्या

| पुणे | वृत्तसंस्था |

पुण्यातील खडक पोलीस स्टेशनच्या अंतर्गत येणाऱ्या लोहिया नगर पोलीस चौकी एका कर्मचाऱ्याने स्वतःवर गोळ्या झाडून आत्महत्या केल्याची घटना शुक्रवारी पहाटेच्या सुमारास घडली आहे. भारत दत्ता अस्मर असे गोळ्या झाडून घेतलेल्या कर्मचाऱ्याचे नाव आहे. कौटुंबिक वादातून हा सर्व प्रकार घडला असण्याची शक्यता वर्तवली जात आहे.

खडक पोलीस ठाण्यात ते नेमणुकीस होते. गुरुवारी रात्रपाळी असल्याने ते कामावर हजर होते. लोहिया नगर पोलीस चौकीत असताना रात्रीच्या सुमारास ते आराम करण्यासाठी म्हणून वर असणाऱ्या खोलीत गेले. यावेळी त्यांच्यासोबत कारबाइन होते. त्यातून त्यांनी चार गोळ्या झाडून घेतल्याचा अंदाज वर्तवला जातोय. त्यांनी हे टोकाचे पाऊल का उचलले हे अद्याप स्पष्ट झाले नाही. मात्र मागील काही दिवसांपासून ते तणावात होते. कौटुंबिक कारणावरून त्यांनी हे पाऊल उचलले असण्याची शक्यता वर्तवली जात आहे. पोलीस अधिक तपास करत आहेत.