हिवाळी अधिवेशनाची तारीख ठरली

। मुंबई । प्रतिनिधी ।

राज्य विधिमंडळाचे आगामी हिवाळी अधिवेशन येत्या 8 डिसेंबरपासून सुरू होणार असल्याची घोषणा विधिमंडळ सचिवालयातर्फे करण्यात आली आहे. या अधिवेशना संदर्भातील तात्पुरते वेळापत्रक सचिवालयाने नुकतेच जाहीर केले आहे. हे हिवाळी अधिवेशन 19 डिसेंबरपर्यंत सुरू राहणार आहे.

वेळापत्रकानुसार, पहिल्या दिवशी पुरवणी मागण्या सादर केल्या जाणार असून, 10 आणि 11 डिसेंबर रोजी या मागण्यांवर चर्चा केली जाईल. 11 डिसेंबर रोजी पुरवणी मागण्यांवर मतदान घेऊन त्या मान्य केल्या जातील. 13 आणि 14 डिसेंबर रोजी अधिवेशनाच्या कामकाजाला सुट्टी जाहीर केली. दुसऱ्या आठवड्यात शासकीय कामांचे नियोजन आहे. अखेरच्या दिवशी म्हणजेच 19 डिसेंबर रोजी अशासकीय कामकाज पूर्ण केले जाईल. दरम्यान, येत्या काळात राज्यात स्थानिक स्वराज्य संस्थांच्या निवडणुका होऊ घातल्या आहेत. त्यामुळे या हिवाळी अधिवेशनात नेमक्या कोणत्या घोषणा केल्या जातात, याकडे सर्वांचे लक्ष लागून राहिले आहे. सध्या राज्यात अतिवृष्टीमुळे शेतकऱ्यांवर संकट ओढवले असून, शेतकऱ्यांसाठीराज्य सरकारकडून कोणती घोषणा या अधिवेशनात केली जाते, याकडे राज्याचे लक्ष लागून आहे.