शार्लोट लेक रस्त्याची दुरवस्था

दगड मातीतून घोड्यांची ये-जा; पर्यटकांना पायी चालतांना अडथळे

| नेरळ | प्रतिनिधी |

माथेरान येथे आठ दिवसात 2000 मिली पावसाची नोंद झाली आहे. या पावसामुळे माथेरान या पर्यटन स्थळावरील सर्वात गजबलेला रस्ता असलेला शार्लोट लेक रस्ता प्रचंड खराब झाला आहे. लेक येथून एको पॉईंटकडे येणारा रस्ता पर्यटकांना पायी चालत जाण्याच्या लायकीचा राहिलेला नाही. त्यामुळे आम्ही पर्यटकांना घोड्यावर बसवून प्रवास करणे म्हणजे अपघाताला निमंत्रण देण्यासारखे असल्याचे अश्वपालक सांगत आहेत.

माथेरान शहरात आजही अनेक रस्ते हे दगड मातीचे आहेत. त्या रस्त्यांची दरवर्षी दगड मातीने दुरुस्त केले जातात. दगड मातीच्या रस्त्यावरून घोडे ये-जा करीत असतात. त्यावेळी बरेचदा घोड्यांवर पर्यटक सवारी करीत असतात. त्यामुळे खराब रस्त्याने प्रवास केला जात असताना घोडे यांचे पाय घसरून घोड्यांना अपघात झाले आहेत, तर घोड्यावरून पर्यटक पडल्याने त्यांना देखील अपघात झाले आहेत. मागील महिन्यात साधारण दहा पर्यटक हे घोड्यावरून पडले असून घोड्यांचे पाय घसरून ही सर्व अपघात झाले आहेत. त्यामुळे माथेरानमधील लाल मातीचे रस्ते दरवर्षी दुरुस्त करण्याची आवश्यकता होती. मात्र, तरी देखील माथेरान नगरपरिषदकडून अनेक रस्त्यांची दुरुस्तीची कामे झालेली नाहीत. त्यामुळे पर्यटकांना घोड्यावरून प्रवास करताना अश्वपालक सतत भीतीच्या छायेत असतात.

सर्वाधिक पर्यटक घोड्यावरून प्रवास करीत असलेल्या माथेरानमधील एको पॉईंट ते शार्लोट लेक असा प्रवास करीत असतात. या रस्त्याने सर्वसामान्य पर्यटक आणि स्थानिक यांना चालण्यास चांगला रस्ता नाही. त्या ठिकाणी रस्त्यावर किमान दीड ते दोन फुटाचे खड्डे पडले आहेत. तर काही भागात चार पाच फुटाचे दगड जमिनीवर डोके काढलेले दिसून येत आहेत. अशा रस्त्याने तेथून जाणारे पर्यटक हे रस्त्याच्या बाजूला असलेल्या पाणी वाहून नेणाऱ्या गटाराचे भीतीवरून चालण्याचा प्रयत्न करतात. तर रस्ता दुरुस्त केला नसल्याने रस्त्यावरून घोडे चालवले जात असताना अपघात होण्याची भीती वाढली आहे.यावर्षी पावसाळ्याचे तीन महिने जाण्याचे बाकी आहेत. त्यामुळे पावसाळ संपेपर्यंत पर्यटकांना घोड्यावर बसवून नेताना कसरत करावी लागणार आहे. त्याबाबत अश्वपालक माथेरान नगरपरिषदेच्या कामाबद्दल नाराजी व्यक्त करीत आहेत. तर घोड्यावरून प्रवास करणारे पर्यटक यांच्याकडून देखील नाराजी व्यक्त केली जात आहे.