सीसीटीव्हीमुळे आरोपी केले जेरबंद

| रसायनी | प्रतिनिधी |

मुंबई पुणे द्रुतगती महामार्गावर चोरीची घटना घडली होती, त्याचा पाठपुरावा खालापूर पोलिसांनी करून सीसीटीव्ही फुटेजच्या आधारे गुन्हेगारांची पाळेमुळे मुंबई डोंगरी येथून खोदून काढली.

गुन्हेगार मुंबई येथील तणावग्रस्त डोंगरी परिसरात असल्याची माहिती मिळताच रायगड पोलीस अधीक्षक आँचल दलाल, अप्पर पोलीस अधीक्षक रायगड अभिजीत शिवथरे, उप विभागीय पोलीस अधिकारी विशाल मेहुल यांच्या वरिष्ठ पोलीस निरीक्षक सचिन पवार, अशोक जगताप सहाय्यक पोलीस निरीक्षक खालापूर व स्थानिक गुन्हे शाखा, मुंबई पोलीस यांनी आरोपींना मोठ्या शिताफीने मुंबई वाडीबंदर डोंगरी येथून आरोपींना ताब्यात घेतले व त्यांच्याकडून मुद्देमाल ही जमा केला. त्यांच्या ह्या कामगिरी बद्दल कौतुक होत आहे. सदरील घडलेली हकीकत दिनांक 9 डिसेंबर 2025 रोजी मुंबई पुणे हायवेवर माडप बोगद्याजवळ घडली होती. फिर्यादी यांचे ताब्यातील माल वाहतूक ट्रकने प्रवास करत असताना मुंबई पुणे एक्सप्रेस हायवे वरील माडप टनेल ते कुंभिवली ब्रिजच्या दरम्यान कोणीतरी अज्ञात इसम चोरटा फिर्यादीच्या चालत्या ट्रकमध्ये चढून ट्रकमधील 32400 रुपये किंमतीचा अल्युमिनियम आलोयन्स इंगोट्स या मालातील 45 नग खाली रस्त्यावर टाकून मागील वाहनाने अज्ञात व्यक्ती जमा करत असल्याचे आढळून आले. सीसीटीव्ही फूटेजच्या आधारे पोलीस उप निरीक्षक अशोक जगताप व गुन्हे प्रकटीकरण शाखा यांनी बातमीदारांच्या मदतीने अर्जुन शंकर काळे, सोहेल रहीम खान हे दोघेही चारनळ चौक डोंगरी मुंबई येथे गुन्ह्यात वापरलेल्या वाहनासह मिळून आल्याने त्यांच्याकडे सदर गुन्ह्याची चौकशी केली असता त्यांनी सदरचा गुन्हा केल्याचे कबूल केले.

सदरचा गुन्हा करताना त्यांच्या सोबत असलेले साथीदारांबाबत विचारपूस केली असता त्यांनी संतोष रतन काळे व उम्मी पूर्ण नाव माहीत नसल्याची माहिती दिली. तसेच दोन्ही साथीदार कुठे आहेत व चोरीचा मुद्देमाल कुठे लपवला आहे. याबाबत आरोपींना विचारले असता त्यांच्याकडून समाधानकारक व उडवाउडवीची उत्तरे मिळत असल्याकारणाने सदर आरोपीस गुन्ह्याचे तपासकामी 11 डिसेंबर रोजी अटक करण्यात आली. सदर आरोपींना न्यायालयात हजर केले असता पोलीस कोठडी मिळाली आहे.

पोलीस कोठडी दरम्यान सदर गुन्ह्यातील गेलेला माल हा घासबंदर माजगाव मुंबई येथील भंगार दुकान मालक मोहम्मद मुजफ्फर कलील मिस्री याचे कडून व उर्वरित माल हा गुन्ह्यात वापरलेल्या इकोकार सह जप्त करण्यात आला आहे. सदरील गुन्ह्यात दोन आरोपी अटक असून दोन फरार आरोपींचा शोध पोलीस घेत आहेत.