| कल्याण | प्रतिनिधी |
कल्याणमध्ये भीषण अपघाताची घटना घडली आहे. भरधाव ट्रकने दोघांना चिरडलं. या अपघातामध्ये आई आणि मुलाचा जागीच मृत्यू झाला. कल्याण पश्चिमेच्या लाल चौकी परिसरात ही दुर्दैवी घटना घडली. हा ट्रेक केडीएमसीचा असून ट्रक चालकाला पोलिसांनी ताब्यात घेतले आहे.
मिळालेल्या माहितीनुसार, कल्याण पश्चिम येथील लालचौकी परिसरात आज दुर्दैवी घटना घडली. केडीएमसीच्या ट्रकच्या धडकेत एका महिलेचा आणि तिच्या मुलाचा जागीच मृत्यू झाला. महिला आपल्या मुलासह रस्ता ओलांडत असताना हा अपघात झाला. निशा सोमेसकर आणि अंश सोमेसकर असे मृत आई आणि मुलाचे नाव आहे. या अपघातानंतर स्थानिक नागरिकांमध्ये संतापाचे वातावरण आहे. अपघाताची माहिती मिळताच कल्याण पोलिसांनी घटनास्थळी धाव घेतली. दोघांचेही मृतदेह शवविच्छेदनासाठी रुग्णालयात पाठवले. पोलिसांनी ट्रक चालकाला ताब्यात घेतले आहे. या प्रकरणाचा पुढील तपास पोलिस करीत आहेत.