| मुंबई | प्रतिनिधी |
मुंबईतील मरीन ड्राईव्ह परिसरात असलेल्या सुप्रसिद्ध ट्रायडेंट हॉटेलमध्ये एका 60 वर्षीय महिलेचा मृतदेह आढळल्याची धक्कादायक घटना घडली आहे. यामुळे परिसरात मोठी खळबळ उडाली आहे. या महिलेचा मृतदेह ट्रायडेंट हॉेटेलच्या 27 व्या मजल्यावर आढळला आहे. सध्या पोलीस या प्रकरणाचा तपास करीत आहेत.
मिळालेल्या माहितीनुसार, मुंबईतील मरीन ड्राईव्ह परिसरातील ट्रायडेंट हॉटेलमध्ये देश-विदेशातील लोक राहण्यासाठी येत असतात. मरीन ड्राईव्हच्या या हॉटेलच्या 27 व्या मजल्यावर एका 60 वर्षीय महिलेचा मृतदेह आढळला आहे. विनती मेहतानी असे या महिलेचे नाव आहे. ही महिला 27 व्या माळ्यावर एका खोलीत राहत होती. नेहमीप्रमाणे या हाॅटेलचे कर्मचारी रुम सर्विससाठी गेले होते. मात्र ही महिला दरवाजा उघडत नव्हती. त्यामुळे कर्मचाऱ्यांनी मास्टर चावीने खोलीचा दरवाजा उघडला. यावेळी ती महिला मृताव्यस्थेत आढळली. यानंतर संबंधित हॉटेल प्रशासनाने तातडीने पोलिसांना याबद्दलची माहिती दिली. पोलिसांनी घटनास्थळी पोहोचून तातडीने पंचनामा केला. या प्रकरणी मरीन ड्राईव्ह पोलिस ठाण्यात अपमृत्यूची नोंद करण्यात आली आहे. सध्या याप्रकरणाची अधिक तपास पोलिस करत आहे.