। अलिबाग । विशेष प्रतिनिधी ।
तालुक्यातील सहा ग्रामपंचायतीसाठी रविवारी शांततेत पार पडलेल्या निवडणूक प्रक्रियेत सरासरी 81.06 टक्के मतदान झाले. सर्वाधिक मतदान मुळे ग्रामंपचायतीत 97.29 टक्के एवढे झाले. तर आक्षीत सर्वाधिक कमी 69.26 टक्के मतदान झाले. पुरुषांच्या तुलनेत महिलांनी जास्त संख्येने मतदान केल्याचे समोर आले आहे. किरकोळ बाचाबाची वगळता तालुक्यात कुठेही अनुचित प्रकार घडल्याचे वृत्त नाही. मंगळवारी मतमोजणीनंतर सर्व उमेदवारांंच्या भवितव्याचा निकाल लागेल.
सकाळ 7.30 वाजल्यापासून मतदानाला सुरुवात झाली. वैजाळी ग्रामपंचायतीत पाच प्रभागात 9 सदस्यपदांसाठी पाच मतदान केंद्रांवर पार पडलेल्या मतदान प्रक्रियेत 3 हजार 038 मतदारांपैकी 2 हजार 418 मतदारांनी मतदानाचा हक्क बजावला. 79.59 टक्के इतके सरासरी मतदान पार पडले. शिरवली ग्रामपंचायतीत तीन प्रभागात सात सदस्यपदांसाठी तीन मतदान केंद्रांवर निवडणूक प्रक्रिया पार पडली. एकुण 922 मतदारांपैकी 837 सरासरीनुसार 90.78 टक्के मतदारांनी मतदान केले. नारंगी ग्रामपंचायतीमध्ये तीन प्रभागात सात सदस्यपदांसाठी तीन मतदान केंद्रांवर निवडणूक प्रक्रिया पार पडली. एकुण 1 हजार 252 मतदारांपैकी 1 हजार 38 मतदारांनी मतदानाचा हक्क बजावला. सरासरीनुसार 82.91 टक्के मतदान नोंद झाले. मुळे तीन प्रभागात सात सदस्यपदांसाठी तीन मतदान केंद्रांवर निवडणूक प्रक्रिया पार पडली. एकुण 702 मतदारांपैकी 683 सरासरीनुसार 97.29 टक्के मतदारांनी मतदान केले. बोरीस गुंजीस तीन प्रभागात सात सदस्यपदांसाठी तीन मतदान केंद्रांवर निवडणूक प्रक्रिया पार पडली. एकुण 1 हजार 018 मतदारांपैकी 917 सरासरीनुसार 90.08 टक्के मतदारांनी मतदान केले. तर आक्षीत तीन प्रभागात नऊ सदस्यपदांसाठी तीन मतदान केंद्रांवर निवडणूक प्रक्रिया पार पडली. एकुण 2 हजार 323 मतदारांपैकी 1 हजार 609 सरासरीनुसार 69.26 टक्के इतके कमी मतदान झाले. तालुक्यात एकुण सहा ग्रामपंचायतींमध्ये 9 हजार 255 मतदारांपैकी 7 हजार 502 मतदारांनी मतदानाचा हक्क बजावला. सरासरीनुसार तालुक्यात 81.06 इतके मतदाना झाले.
तहसिलदार विशाल दौंडकर, निवासी नायब तहसिलदार अजित टोळकर यांच्या मार्गदर्शनाखाली निवडणूक प्रक्रिया शांततेत पार पडली. अलिबाग पोलिस ठाण्याचे पोलिस निरीक्षक शैलेश सणस, मांडवा सागरी पोलिस ठाण्याचे पोलिस निरीक्षक राजीव पाटील तसेच पोयनाड पोलिस ठाण्याचे सहायक पोलिस निरीक्षक नरेंद्र बेलदार यांच्या नेतृत्वाखाली पोलिस बंदोबस्त तैनात ठेवण्यात आला होता.