चला व्यसनाला बदनाम करूया, फटाकेमुक्त नववर्ष साजरे करूया

महाराष्ट्र अंनिसतर्फे व्यसन विरोधी व फटाकेमुक्त पंधरवडा
जिल्ह्यातील कार्यकर्ते सज्ज
| पाली/बेणसे | प्रतिनिधी |
अनेकजण दारूचे पॅक रिचवत सरत्या वर्षाला निरोप व नवीन वर्षाचे स्वागत करतात. मद्द व व्यसनापासून लोकांना व खासकरून तरुणांना परावृत्त करण्यासाठी महाराष्ट्र अंनिसचे डॉ. नरेंद्र दाभोलकरांच्या कल्पकतेतून साकारलेली चला व्यसन बदनाम करूया ही व्यसन विरोधी मोहीम महाअंनिस मागील अनेक वर्षे राबवत आहे. या मोहिमेअंतर्गत 15 डिसेंबर ते 31 डिसेंबर 2022 या कालावधीमध्ये व्यसनविरोधी पंधरवडा राबविला जात आहे. रायगड जिल्ह्यात या मोहिमेला सुरुवात झाली आहे.

या पंधरवाड्यांंतर्गत व्यसनाच्या दुष्परिणाम बाबत ऑनलाईन/ऑफलाईन व्याख्यानाचे आयोजन करणे. सोशल मीडियावर व्यसन विरोधी पोस्ट प्रसारित करणे. फटाक्याच्या दुष्परिणामाची पत्रके वाटणे व प्रत्यक्ष 31 डिसेंबरला दुधाचे वाटप करणे याद्वारे प्रबोधन करणे. 31 डिसेंबरला दारू नको दूध प्या, फटाके नको भेटवस्तू द्या या अभिनव कार्यक्रमाचे आयोजन करून या कार्यक्रमांमध्ये नागरिकांना दारूचे दुष्परिणाम सांगून दारू ऐवजी शरीराला हितकारक दूध पिण्याचे आवाहन करणे, शाळा कॉलेजमध्ये दाखवणे, गावामध्ये व्यसन विरोधी फेरीचे आयोजन करणे, शाळा कॉलेजमध्ये व्यसनाविषयी भाषण देणे, दारूच्या बाटलीला जोडे मारा आंदोलन, व्यसन विरोधी प्रतिज्ञा असलेल्या फ्लेक्स वर नागरिकांच्या सह्या घेणे तसेच सोशल मिडिया मध्ये व्यसन विरोधी संदेश प्रसारित करणे, व्यसनमुक्त व्यक्ती आणि त्यांचे कुटुंबीय यांचे स्नेहमेळावे या सारखे उपक्रम राबविले जात आहेत.

पुढाकार
मागील वर्षी अंनिसने पाली, पेण, अलिबाग, खोपोली आदी शाखेने हा उपक्रम राबविला होता. अंनिस पेण शाखेतर्फे दरवर्षी हा उपक्रम राबविला जातो आणि त्याला अतिशय चांगला प्रतिसाद मिळतो. तसेच पालीतील संघर्ष ग्रुप व फक्त पाली विकास ग्रुप तर्फे 2020 साली . द दारूचा नव्हेफ, द दुधाचा म्हणत दुधाचे मोफत वाटप करण्यात आले. या अनोख्या उपक्रमात पालिकरांनी व भाविकांनी देखील उत्स्फूर्त सहभाग घेतला होता.

31 डिसेंबरला व्यसनाचे सर्वाधिक उदात्तीकरण होते. यामुळे तरुण मुले व्यसनाच्या आहारी जाण्याचे प्रमाण वाढताना दिसत आहे. ख्रिसमस आणि 31 डिसेंबर साजरे करताना सर्वत्र फटाक्याचा वापर भरपूर होतो. त्यामुळे ध्वनीप्रदूषण, वायूप्रदूषण, बालमजुरीला प्रोत्साहन, लाखो रुपयांचा चुराडा, अपघात, पर्यावरणाचा र्‍हास या सारखे दुष्परिणाम होतात. हे टाळण्यासाठी व प्रबोधन होण्यासाठी महाराष्ट्र अंनिसतर्फे व्यसन विरोधी व फटाकेमुक्त पंधरवडा राबविला जातो. रायगड जिल्ह्यात उपक्रमाला चांगला प्रतिसाद मिळतो. – मोहन भोईर, जिल्हा कार्याध्यक्ष, महा. अंनिस, रायगड