रेशनधारकांना सर्व्हर डाऊनचा फटका; लाभार्थी धान्यापासून वंचित

पंधरा दिवसांपासून पॉझ मशीन बंद

| आगरदांडा | प्रतिनिधी |

मुरुड तालुक्यासह शहरातील स्वस्त धान्य दुकानदारांचे पॉझचे सर्व्हर पंधरा दिवसांपासून डाऊन असल्याने शहरातील धान्य वितरण व्यवस्था कोलमडली आहे. याचा मोठ्या प्रमाणात फटका शहरातील शेकडो रेशनकार्डधारकांना बसला आहे. शेकडो नागरिकांना स्वस्त धान्यापासून वंचित राहण्याची वेळ ओढवली असून, लाभार्थी दिवाळीमध्ये धान्यापासून वंचित राहिल्याने नागरिकांनी नाराजी व्यक्त केली आहे.

शासनाने सर्व रेशनकार्डाची नोंदणी पॉझ मशीनमध्ये आरसी नंबर केली आहे. आधार क्रमांकानुसार नोंद करून घेतली आहे. या सर्व मशीन एका लहान अँटिनाद्वारे ऑनलाइन सर्व्हरने जोडल्या असतात.

मागील पंधरा दिवसांपासून तालुक्यासह शहरातील सर्व्हर डाऊन असल्याने धान्य वाटपाचे काम ठप्प आहे. धान्याचा कोटा सर्व दुकानदारांनी आणून ठेवला आहे. दररोज ग्राहक दुकानात चकरा घालून खाली हाताने परत जात आहेत. ग्रामीण भागात एकूण 28, तर शहरात 4 रेशन दुकान आहे. सर्व्हरच डाऊन असल्यामुळे या रेशन दुकानांमधील मशीन शोभेच्या वस्तू ठरल्या आहेत. शासनाने संपूर्ण धान्य वाटप ‘ऑनलाइन’ केल्यामुळे धान्य दुकानदारांना ‘ऑफलाइन’ धान्यवाटप करता येत नसल्याने सामान्य जनतेमधून तीव्र असंतोष व्यक्त होत आहे.

रेशनधारक वेदक यांनी यावेळी प्रतिक्रिया देताना म्हणाले की, आमच्या घरापासून एक किलोमीटरपेक्षा जास्त अंतरावर आमचा रेशन दुकान आहे. रेशन आण्याकरिता रिक्षा घेऊन जावे लागते. परंतु, या बिघाड मशीनमुळे आम्हाला धान्य न मिळाल्याने आम्हाला आर्थिक तोटा सहन करावा लागत आहे. तरी या मशीनबाबत योग्य निर्णय घ्यावा, असे मत यावेळी वेदक यांनी व्यक्त केले.

शहरातील रास्त भाव दुकानदार यांनी सांगितले की, पंधरा दिवसांपासून सर्व्हर ये-जा करीत आहे. याचा परिणाम पॉझ मशीनवर होत असल्याने रेशनधारकांना थम घेण्यासाठी वेळ लागत आहे. कधी कधी थम होत नाही. त्यामुळे रेशनधारकांना रिकाम्या हाताने परतावे लागत आहे. त्यामुळे काही रेशनधारकांच्या रोषला आम्हाला सामोरे जावे लागते. काही रेशनधारक बोलतात की ही मशीन समुद्रात फेकून टाका. असा राग ही याठिकाणी ग्राहकांकडून व्यक्त केला जात आहे. तरी लवकरात लवकर सर्व्हरचा समस्या दूर करावी, अशी मागणी तहसीलदार कार्यालयात केली आहे. आम्ही ग्राहकांसाठी रविवारीही दुकान उघडं ठेवलं आहे, तसेच वेळही जास्त दिला आहे, जेणेकरून ग्राहकांना आपलं धान्य घेऊन जाता येईल.

आमच्याकडे धान्य मिळत नाही, याची मशीन चालत नाही, यासंदर्भात रेशनधारकांच्या फोनवरून तक्रार आल्यानंतर मी स्वतः शहरात व ग्रामीण भागात भेट देऊन पाहणी केली. त्यावेळी पॉझ मशीन सर्व्हर डाऊनमुळे चालत नसल्याने ग्राहकांचा थम बसत नाही, असे निदर्शनास आले. या संदर्भातील रिपोर्ट जिल्हा पुरवठा अधिकारी यांच्याकडे साधार केला आहे.

सचिन राजे
अव्वल कारकून, पुरवठा विभाग

सर्व्हर डाऊनमुळे प्रॉब्लेम होत आहे. त्यांचा रिपोर्ट जिल्हा पुरवठा अधिकारी यांच्याकडे पाठविला. लवकरच सर्व्हर सुरळीत चालू होईल.

रवींद्र सानप
नायब तहसीलदार

शासनाने ऑनलाईन धान्य वितरण बंद करून ऑफलाईन पद्धतीने धान्य वितरण करावे जेणेकरून रेशनधारकांना आपले धान्य वेळेवर घेऊन जाता येईल.

दिलीप मिरजणकर
रेशनधारक