नदीकाठावर एक्सपायरी औषधांचा ढिगारा

लहान मुलांच्या जीवाला धोका; प्रशासनाच्या निष्क्रियतेवर नागरिकांचा संताप

। चणेरा । प्रतिनिधी ।

रोहा तालुक्यातील उडवणे परिसरात अनेक गावांना जोडणाऱ्या मुख्य रस्त्यालगत नदीच्याकडेला मोठ्या प्रमाणावर एक्सपायर झालेली औषधे उघड्यावर फेकून दिल्याचा अत्यंत गंभीर व धक्कादायक प्रकार समोर आला आहे. या ठिकाणी सिरपच्या बाटल्या, गोळ्यांचे मोठमोठे पाकिटे, विविध औषधांचे बॉक्स तसेच वैद्यकीय कचऱ्याचा मोठा ढिगारा आढळून आला असून काही औषधांची विल्हेवाट लावण्याच्या नावाखाली जागेवरच जाळपोळ करण्यात आली आहे. यामुळे अर्धवट जळालेला औषध कचरा परिसरात विखुरलेला दिसून येत आहे.

प्रत्यक्ष पाहणीदरम्यान अनेक औषधांच्या पॅकिंगवर बालरुग्णांसाठी वापरली जाणारी औषधे असल्याचे स्पष्टपणे दिसून आले आहे. लहान मुलांसाठी असलेली ही औषधे उघड्यावर फेकण्यात आल्याने संभाव्य धोका अधिकच गंभीर ठरत आहे. विशेष म्हणजे औषधांच्या या ढिगाऱ्याच्या अगदी जवळच लहान मुलांची शाळा असून या रस्त्यावरून रोज शाळकरी विद्यार्थी, शेतकरी, कामगार व नागरिकांची मोठ्या प्रमाणावर ये-जा सुरू असते. हा रस्ता मुख्य असल्याने तसेच रस्त्यालगत मोठी वस्ती असल्यामुळे कधीही अपघात घडण्याची शक्यता नाकारता येत नाही. नदीच्या पलिकडे उडवणे गावासह इतर परिसर जोडलेले असल्याने या प्रदूषणाचा फटका मोठ्या लोकसंख्येला बसण्याची भीती व्यक्त केली जात आहे. संपूर्ण प्रकरणात संबंधित औषध विक्रेते, वैद्यकीय संस्था किंवा कचरा विल्हेवाट लावणाऱ्या यंत्रणांची चौकशी होणे अत्यावश्यक असल्याची मागणी नागरिक करत आहेत. अन्न व औषध प्रशासन, महाराष्ट्र प्रदूषण नियंत्रण मंडळ तसेच स्थानिक प्रशासन यांनी तात्काळ दखल घेऊन दोषींवर कठोर कारवाई करावी, अन्यथा तीव्र आंदोलन छेडण्याचा इशाराही नागरिकांकडून देण्यात येत आहे.

पाणी प्रदूषित
स्थानिक नागरिकांच्या म्हणण्यानुसार औषधांमधील घातक रासायनिक घटक नदीत मिसळून पाणी प्रदूषित होत आहे, तर जाळलेल्या औषधांचा धूर मानवी आरोग्यास अत्यंत अपायकारक आहे. नियमांनुसार एक्सपायर औषधांची सुरक्षित व शास्त्रशुद्ध पद्धतीने विल्हेवाट लावणे बंधनकारक असताना उघड्यावर औषधे टाकणे व जाळणे हा कायद्याचा गंभीर भंग आहे.