। मुंबई । प्रतिनिधी ।
मुंबई शहर कबड्डी असो.च्या मान्यतेने अमरहिंद मंडळाने महिला व किशोर गटाच्या जिल्हास्तरीय कबड्डी स्पर्धेचे आयोजन दादर येथील मंडळाच्या पटांगणावर करण्यात आले होते. या स्पर्धेत अंतिम सामन्यांत डॉ. शिरोडकर स्पोर्ट्स आणि विजय क्लब यांनी अनुक्रमे महिला आणि किशोर गटाचे जेतेपद पटकावले आहे.
या स्पर्धेतील अत्यंत चुरशीने खेळला गेलेल्या महिलांच्या अंतिम सामन्यात डॉ. शिरोडकरने सुरुवाती पासून आघाडी राखण्यात यश मिळविले होते. विश्रांतीला 24-21 अशी शिरोडकरकडे आघाडी होती. मात्र, धनश्री पोटे, साक्षी पवार यांच्या चढाई पकडीच्या खेळाने हा विजयाचा चमत्कार घडविला. आणि शिरोडकरने आपला पारंपारिक प्रतिस्पर्धी शिवशक्ती महिला मंडळाला 35-34 असे चकवत अमरहिंद चषकावर नाव कोरले. तर, शिवशक्ती संघाला उपविजेतेपदावर समाधान मानावे लागले आहे. विजेत्या डॉ. शिरोडकर संघाला अमरहिंद चषक व रोख रक्कम 10 हजार रुपये, तसेच उपविजेत्या शिवशक्तीला चषक व रोख रक्कम 5 हजार रुपये देऊन गौरविण्यात आले. डॉ. शिरोडकर स्पोर्ट्ची मेघा कदम सर्वोत्तम खेळाडू ठरली असून तिला रोख रक्कम 3 हजार रु., बॅग व स्मृती चषक देऊन गौरविण्यात आले.

किशोर गटात समर्थ कासुराडे, रोहित चौगुले यांच्या चतुरस्त्र खेळाने 25-23 अशी आघाडी घेणार्या न्यू परशुरामला उत्तरार्धात विजय क्लबने पुरते नामोहरण केले. श्रेयस पिल्लारे, राज गुप्ता यांनी उत्तरार्धात आपला खेळ गतिमान करीत विजय क्लबच्या जेतेपदावर आपली मोहर उमटविली. विजय क्लबने न्यू परशुराम मंडळाचा प्रतिकार 51-41 अशा मोडून काढत किशोर गटांत अमरहिंद चषकावर आपले नाव कोरले. तर, न्यू परशुराम संघाला दुसर्या क्रमांकावर समाधान मानावे लागले. विजेत्या विजय क्लब संघाला अमरहिंद चषक व रोख रक्कम 7 हजार रु., तसेच उपविजेत्या न्यू परशुरामला चषक व रोख रक्कम 4 हजार रु. देऊन सन्मानित करण्यात आले. न्यू परशुराम मंडळाचा समर्थ कासूरडे किशोर गटात सर्वोत्तम खेळाडू ठरला. त्याला रोख रक्कम 2 हजार रु., बॅग व स्मृती चषक देऊन गौरविण्यात आले.