Ganesha Idol Artist: गीध कुटुंबाचा शतकभराचा कलावारसा

शाडू माती अन्‌‍ कागदी लगद्यापासून मूर्ती; बाजारात मोठ्या प्रमाणात मागणी

| रसायनी/आपटा | प्रतिनिधी |

पुठ्ठ्याचा लगदा आणि शाडूची माती एकत्र करून पर्यावरणपूरक गणेशमूर्ती बनवण्याचे काम मोहोपाड्यातील शिवनगर येथील गीध कुटुंबीय करत आहेत. शाडूच्या मातीच्या मूर्तीपेक्षा वजनाने हलक्या असणाऱ्या या गणेशमूर्तींना सध्या बाजारात मोठ्या प्रमाणात मागणी आहे.

काळ बदलला, तंत्रज्ञान बदलले आणि बाजारपेठही बदलली; परंतु, खालापूर तालुक्यातील मोहोपाडा येथील गीध कुटुंबीयांनी शतकभरापासून जोपासलेली गणेशमूर्ती घडविण्याची परंपरा आजही तितक्याच श्रद्धेने, निष्ठेने आणि कलात्मकतेने जिवंत ठेवली आहे. या कलेची मुहूर्तमेढ स्वर्गीय यशवंत गीध यांनी रोवली. त्यांनी सुरू केलेला हा वडिलोपार्जित वारसा त्यांचे पुत्र पुरुषोत्तम गीध यांनी समर्थपणे पुढे नेला आहे. वयाच्या अवघ्या दहाव्या वर्षांपासून वडिलांच्या सानिध्यात गणेशमूर्ती घडविण्याचे धडे घेतलेल्या पुरुषोत्तम गीध यांनी आज वयाच्या 75व्या वर्षीही त्याच जिद्दीने आणि उत्साहाने ही कला जपली आहे. आणि आता त्यांचे पुत्र वैभव गीध हे समर्थपणे पुढे नेत आहेत.

गेली अनेक वर्षे शाडू मातीच्या मूर्ती घडवणाऱ्या वैभव गीध यांनी मागील वर्षी पुठ्ठ्याचा लगदा आणि शाडूची माती एकत्र करून प्रथम स्वतःसाठी एक गणेशमूर्ती बनवली होती. तिचे फिनिशिंग, वजनाचा हलकेपणा आणि टिकाऊपणा यामुळे त्यांनी यावर्षी ग्राहकांनाही अशाच मूर्ती देण्याचे ठरवले. त्यांच्या या उपक्रमाला भाविकांनी प्रचंड दाद दिली असून, चक्क 750 गणेशभक्तांनी त्यांच्याकडून या पर्यावरणपूरक गणेशमूर्ती बुक केल्या आहेत. आकर्षक मूर्ती, त्यावर केलेले चांगले रंगकाम आणि डोळ्यांची सुंदर आखणी यामुळे त्यांच्या गणेशमूर्तींना रसायनीसह पनवेल, पेण, कर्जत, खोपोली आणि मुंबईत जोरदार मागणी आहे. दरवर्षी दसऱ्यापासून गणेशमूर्ती घडविण्याचे काम सुरू होते. सुमारे 60 टक्के शाडू माती आणि 40 टक्के पुठ्ठ्याच्या लगद्याचा वापर करून दोन इंचांपासून चार फूट उंचीपर्यंतच्या विविध आकारांच्या मूर्ती पूर्णपणे हाताने तयार केल्या जातात. याशिवाय आकर्षक गौरीमूर्तीदेखील त्यांच्या हातून साकारतात.