सायबर फसवणूक रोखण्यासाठी विद्यार्थ्यांना मार्गदर्शन

सहज सेवा फाऊंडेशनचा स्तुत्य उपक्रम

| खोपोली | वार्ताहर |

ऑनलाइनच्या माध्यमातून होणारी फसवणूक व आपली सतर्कता हे विद्यार्थीदशेत खूप महत्त्वाचे आहे. विद्यार्थी व विद्यार्थिनींनी सोशल मीडियाचा वापर शैक्षणिक प्रगतीसाठी करावा, असे प्रतिपादन सहाय्यक पोलीस निरीक्षक हरेश काळसेकर यांनी केले. सहज सेवा फाऊंडेशनच्या माध्यमातून सह्याद्री इंग्लिश मीडियम स्कूल, शीळफाटा येथील विद्यार्थ्यांसाठी आयोजित केलेल्या सायबर क्राईम व ऑनलाईन फसवणूक रोखण्यासाठी मार्गदर्शन शिबिरात ते बोलत होते. हे शिबीर सोमवार, (दि.15) जैन भवन, शीळफाटा येथे आयोजित करण्यात आले.

सहजसेवा फाऊंडेशनच्या माध्यमातून शहरी व ग्रामीण भागातील शाळांमधील विद्यार्थ्यांमध्ये जागरूकता निर्माण करण्यासाठी नामांकीत डॉक्टर्स व समुपदेशक यांच्या मार्गदर्शनाखाली शालेय वर्ष (2022-23) या वर्षात विविध शाळांमध्ये मार्गदर्शन संपन्न होत आहेत. याच अनुषंगाने हे शिबीर पार पडले. यावेळी खोपोली पोलीस ठाण्याचे वरिष्ठ पोलीस निरीक्षक शिरीष पवार यांच्या मार्गदर्शनाखाली सहाय्यक पोलीस निरीक्षक हरेश काळसेकर यांनी विद्यार्थ्यांशी प्रश्‍नोत्तराच्या मार्गाने प्रभावी प्रबोधन केले.

यावेळी मुख्याध्यापिका समीक्षा ढोके, सना जीलानी, धनश्री भोईर, अश्‍विनी सोलंकी तसेच खोपोलीचे माजी नगराध्यक्ष व शीळफाटा जैन संघाचे अध्यक्ष सोहनराज राठोड, जैन समाजाचे गुरुवर्य मनवित, संग्राम देशमुख उपस्थित होते. आजच्या उपक्रमास बहुसंख्येने विद्यार्थी उपस्थित होते.

कार्यक्रमाच्या यशस्वीतेसाठी सहज सेवा फाउंडेशनचे अध्यक्ष डॉ. शेखर जांभळे, कार्याध्यक्षा माधुरी गुजराथी, उपाध्यक्षा इशिका शेलार, सचिव वर्षा मोरे, खजिनदार संतोष गायकर, संघटक निलम पाटील, जनसंपर्क प्रमुख जयश्री कुलकर्णी, मार्गदर्शक मोहन केदार व उपक्रम प्रमुख दिवेश राठोड यांनी परिश्रम घेतले. या उपक्रमासाठी सह्याद्री इंग्लिश स्कूलचे चेअरमन नरेंद्र शाह, जैन संघ, शीळफाटा यांचे सहकार्य लाभले.