नवी मुंबईत भाजपमध्ये अंतर्गत वाद?

नवी मुंबई | प्रतिनिधी |
नवी मुंबईतील ताई-दादांचे भांडण अजून शमले नसल्याचे दिसून येत आहे. जर माझ्या मतदारसंघात येऊन बाहेरचे कोणी ढवळाढवळ करत असतील तर आपणही आता ऐरोली मतदारसंघातील नागरिकांचे प्रश्‍न सोडवण्यासाठी रस्त्यावर उतरणार असल्याचे आमदार मंदा म्हात्रे यांनी पत्रकार परिषदेत स्पष्ट केले आहे.
महापालिकेची सार्वत्रिक निवडणूक तोंडावर आली असताना नवी मुंबई भाजपमधील अंतर्गत वाद पुन्हा एकदा चव्हाट्यावर आले आहेत. स्थानिक नेत्यांकडून पक्षातील महिला पदाधिकारी व कार्यकर्त्यांना डावलण्यात येत असल्याचे सांगत भाजपच्या आमदार मंदा म्हात्रे यांनी काही दिवसांपूर्वी थेट आमदार गणेश नाईक यांच्या कार्यपद्धतीवर निशाणा साधला होता. आता आपणही ऐरोली मतदारसंघातील नागरिकांच्या समस्या सोडविण्यासाठी रस्त्यावर उतरू, असे आव्हान त्यांनी दिले आहे. त्यामुळे नवी मुंबईतील दादा-ताईंचे भांडण सोडवण्यात भाजपलाही अपयश आल्याची चर्चा सर्वत्र सुरू आहे.
ऐरोली विधानसभा मतदारसंघातील स्थानिक मच्छिमार बांधवांचे प्रलंबित प्रश्‍न सोडविण्यासाठी बेलापूरच्या आमदार मंदा म्हात्रे यांनी मेरीटाइम बोर्डाशी संपर्क साधला असून दानशूर व्यक्तींच्या मदतीने दिवा व घणसोली येथील जेट्टीचे क्षेत्र मोठे करण्यासाठी आपण पुढाकार घेतल्याचे त्यांनी पत्रकार परिषदेत सांगितले. ऐरोली विधानसभा मतदारसंघातील नागरिक त्यांच्या अडीअडचणी सोडविण्यासाठी आपल्याकडे नेहमीच येत असतात. परंतु, आपण कधी त्या गोष्टींचा गाजावाजा केला नाही. मात्र, पक्षातील स्थानिक नेते भाजपमधून आपलाच पत्ता कट करण्यासाठी कारस्थाने रचत आहेत. त्यांना धडा शिकवण्यासाठी आता आपण केवळ बेलापूर मतदारसंघापुरते कार्यरत न राहता संपूर्ण नवी मुंबई क्षेत्रातील जनतेचे प्रश्‍न सोडविण्यास प्राधान्य देणार असल्याचे म्हात्रे यांनी स्पष्ट केले.
नवी मुंबईतील जेट्टी व्हिजन संदर्भात माहिती देण्यासाठी आमदार मंदा म्हात्रे यांनी पत्रकार परिषदेचे आयोजन केले होते. बेलापूरसह ऐरोली मतदारसंघातील दिवा कोळीवाडा, घणसोली, कोपरखैरणे आदी गावामधील कोळी मच्छिमार बांधवांसाठी जेट्टी, जलवाहतूक, मत्स विक्रीसाठी शेड उभारणे आदी प्रश्‍न तसेच बेलापूर येथे मरिना, शासकीय रुग्णालय, सागरी जल वाहतूक यांसह ऐरोली ते बेलापूर पट्टीतील स्थानिक नागरिकांचे प्रश्‍न सोडविण्याचे सूतोवाच त्यांनी केले.

मुख्यमंत्र्यांकडून नेहमीच सहकार्य
ऐरोली व बेलापूर मतदारसंघातील नागरिकांचे प्रश्‍न सोडवण्यासाठी महाविकास आघाडी सरकारचे मुख्यमंत्री उद्धव ठाकरे यांचे सहकार्य मिळत असल्याचे स्पष्ट करून आगामी काळात अनेक विकास प्रकल्प पूर्ण झाल्यावर नवी मुंबई शहराच्या नावलौकिकात भर पडेल, असे त्या म्हणाल्या. नवी मुंबईचे प्रश्‍न सोडविताना राज्याच्या मुख्यमंत्र्यांकडून आपल्याला नेहमीच सहकार्य मिळाल्याची भावना त्यांनी व्यक्त केली.