विवाह संकेतस्थळावरून महिलांची आर्थिक फसवणूक करणारा जेरबंद

। नेरळ । प्रतिनिधी ।

एक महाठग जीवनसाथी डॉट कॉम या संकेतस्थळावर महिलांना आपल्याकडे आकर्षित करत त्यांच्याशी लग्न करून त्यांची आर्थिक फसवणूक करत होता. त्याबाबत कर्जत पोलिस ठाण्यात गुन्हा दाखल करण्यात आला होता. त्यांनर नाशिक येथून आरोपीला ताब्यात घेण्यात आले आहे. प्रतीक संजय देवरे (37) असे आरोपीचे नाव आहे.

नाशिक येथील प्रतीक देवरे हा ऑनलाईन पद्धतीने महिलांशी ओळख वाढवत असे. तो जीवनसाथी डॉट कॉम या विवाह संकेतस्थळावरून महिलांशी ओळख करून त्यांचा विश्‍वास संपादन करायचा. त्यानंतर पुढे प्रतिक देवरे हा त्या तरुणीला लग्नाचे आमिष दाखवायचा. अशाच एका गुन्ह्यात या तरुणाने आपल्याला अमरावती येथे बिअर शॉप विकत घ्यायचे असल्याचे सांगितले होते. त्यासाठी पैशांची गरज असल्याचे भासवून, संबंधित तरुणीच्या स्टेट बँक ऑफ इंडिया, बँक ऑफ बडोदा आणि एचडीएफसी आदी बँकेतील खात्यातून 7 लाख रुपये ऑनलाईन पद्धतीने स्वतःच्या ऍक्सेस बँक खात्यात ट्रान्सफर करून घेतले होते. तसेच, रोख स्वरूपात 90 हजार रुपये घेत एकूण 7.90 लाख रुपये प्रतिक देवरे याला देण्यात आले होते. मात्र, आपली फसवणूक झाली असल्याचे लक्षात आल्यावर या प्रकरणी 6 फेब्रुवारी रोजी कर्जत पोलीस ठाण्यात गुन्हा दाखल करण्यात आला होता.

दरम्यान, कर्जत पोलीस निरीक्षक सुरेंद्र गरड यांच्या मार्गदर्शनाखाली पोलीस उपनिरीक्षक कीर्ती कुमार गायकवाड, पोलीस हवालदार समीर भोईर आणि स्वप्नील येरुनकर यांच्या गुन्हे प्रकटीकरण पथकाने सर्व बाबींचा तांत्रिक तपास केला. त्यानंतर सापळा रचून आरोपी प्रतीक देवरा याला नाशीक येथून ताब्यात घेण्यात आले आणि शनिवारी (दि.1) कर्जत येथे आणण्यात आले.

महाराष्ट्रभर महिलांची फसवणूक
तपासादरम्यान काही धक्कादाय गोष्टी उघडकीस आल्या आहेत. प्रतीक देवरा या आरोपीने महाराष्ट्रभर विविध महिलांना जीवनसाथी आणि इतर विवाह संकेतस्थळांद्वारे फसवले असल्याचे समोर आले आहे. अशा संकेतस्थळांवर तो महिलांशी जवळीक साधत त्यांचा विश्‍वास संपादन करत असे. आणि शेवटी काही कारणास्तव पैशांची मागणी करत त्यांची आर्थिक फसवणूक करत होता. त्यामुळे त्याच्या विरोधात इतर ठिकाणीही गुन्हे दाखल असण्याची शक्यता पोलिसांकडून वर्तविली जात आहे.

तरुणींनी सतर्क राहावे
सध्या ऑनलाइन फसवणुकीच्या प्रमाण वाढ होत आहे. त्यामुळे महिलांनी अनोळखी व्यक्तींशी जपून वागावे. त्यांच्यावर विश्‍वास ठेवण्यापूर्वी योग्य ती तपासणी करावी. तसेच, अशा घटनांची पुनरावृत्ती टाळण्यासाठी नागरिकांनी तात्काळ पोलिसांकडे तक्रार नोंदवावी, असे आवाहन कर्जत पोलिसांकडून करण्यात आले आहे.