। पनवेल । वार्ताहर ।
पुणे येथील विज्ञान विद्या प्रा.लि. कंपनीच्या व्यवसायाची वाढ करण्यासाठी आर्थिक निधीची गरज असतानाच निवृत फॉरेस्ट अधिका-यांशी तक्रारदार यांची ओळख झाली. यावेळी दोन गुंतवणूकदारांनी कोल्हापुरचे राज्यमंत्री सतेज उर्फ बंटी पाटील यांच्या नावाचा वापर करत लोनच्या रकमेच्या अर्धा टक्का कमिशन अॅडव्हान्स द्यावे लागतील, असे सांगून तक्रारदार महिलेची सुमारे दहा लाख रुपयांची फसवणूक केल्याचा प्रकार उघडकीस आला आहे.
याबाबत कामोठे पोलीस ठाण्यात फसवणुकीचा गुन्हा दाखल झाला असून अधिक तपास पोलीस करीत आहेत. याबाबत विनायक शंकरराव पाटील उर्फ विनायक शंकरराव रामुगडे (रा.कराड, सातारा) व एका अज्ञाताविरोधात तक्रार दाखल करण्यात आली आहे.
काय आहे खरी स्टोरी…
स्टारगेज पुणे येथे राहणार्या 42 वर्षीय महिलेची मे. विज्ञान विद्या प्रा.लि. नावाची कंपनी आहे. या कंपनीच्या व्यवसायाची वाढ करण्यासाठी मोठ्या आर्थिक निधीची आवश्यकता होती. त्यामुळे गेल्या एक वर्षापासून तक्रारदार महिला बँक तसेच गुंवणूकदार यांच्याकडे कर्जासाठी प्रयत्न करीत होती.
यावेळी सोहम दिक्षीत यांच्यामार्फत कामोठे येथील अशोक जाधव या निवृत्त फॉरेस्ट अधिकार्यांशी त्यांची ओळख झाली असता जाधव यांनी विनायक पाटील यांच्याशी संपर्क साधून दिला. तक्रारदार महिला यांनी पाटील यांच्याशी संपर्क साधला असता विनायक पाटील यांनी कोल्हापुरचे पालकमंत्री सतेज उर्फ बंटी पाटील यांच्यासोबत जवळचे संबंध असून लोनचे काम करून देतो. मात्र त्या बदल्यात लोनच्या रकमेच्या अर्धा टक्का कमिशन अॅडव्हान्स द्यावा लागेल, असे सांगितले.
सदर महिला कागदपत्रे घेऊन कामोठे येथे पोहोचल्या असता अशोक जाधव यांनी विनायक पाटील, अनिश काशिनाथ कांबळी यांची ओळख करून दिली. यावेळी विनायक पाटील यांनी बंटी पाटील यांच्याकडुन कंपनीस 5 कोटींची गुंतवणुक करून देतील व याकरीता त्यांना 6 टक्के व्याज द्यावा लागेल, असे सांगितले. याकरीता रोख रुपये अडीच लाख कमिशन अॅडव्हान्समध्ये बंटी पाटील यांच्या स्विय सहाय्यकाकरीता त्यांच्याकडे द्यावे लागतील, असे सांगितले.
त्यावेळी विनायक पाटील यांनी बंटी पाटील यांचे स्वीय सहाय्य्क यांच्याशी त्या महिलेचा संपर्क करून बोलणे करून देतो, असे सांगितल. तसेच फोनवर समोरील व्यक्तीने काम होवून जाईल असे सांगितले. यावेळी त्या महिलेला विश्वास बसला. त्यामुळे महिलेने अडीच लाख रुपये दिले. तसेच प्रपोजल फाईल व पैसे मंत्री बंटी पाटील यांच्या स्विय सहाय्यकाकडे अनिश कांबळी यांच्यामार्फत वाहनाने पाटविण्याकरिता वाहतुक खर्च म्हणून पाच हजार रुपये घेतले.
यानंतर तुळजापुर येथील 60 एकर जमीन जागा त्या महिलेच्या नावावर करतो, व त्या जमिनीच्या बदल्यात लोन मिळेल असे सांगून 6 लाख रुपयांची मागणी केली. असे करून एकूण त्या तक्रादार महिलेची दहा लाख पाच हजार रुपये या भामट्यानी खोटे बोलून काढून घेतले. त्यानंतर काही दिवसांनी विनायक पाटील यांनी तक्रारदार महिला यांना फोन करून सांगतले कि, कोल्हापूरची निवडणूक आहे. त्यामुळे सध्या काम होणार नाही. निवडणुकीनंतर बघू, अशी अनेक कारणे दिली. अखेर त्या महिलेने जाधव यांना संपर्क केला असता त्यांनी पाटील हा फसवणूक करणारा असल्याचा सांगितले.
यावेळी आपली फसवणूक झाल्याचे लक्षात येताच त्या महिलेने तात्काळ कामोठे पोलीस ठाणे गाठत घडलेल्या प्रकारची माहिती दिली. याप्रकरणी आरोपी विनायक शंकरराव पाटील उर्फ विनायक शंकरराव रामुगडे व एका अनोळखी व्यक्तीविरोधात कामोठे पोलीस ठाण्यात फसवणुकीचा गुन्हा दाखल करण्यात आला असून अधिक तपास पोलीस करीत आहेत.