विशाल येलवे यांचे माणगावात मोटारसायकल अपघातात दुर्दैवी निधन
| माणगाव | सलीम शेख |
मुंबई – गोवा महामार्गावर ता.माणगाव जि.रायगड याठिकाणी आपले कर्तव्य बजावणारे रायगड अलिबाग वाहतूक शाखेचे कर्तव्य तत्पर पोलीस हवलदार विशाल विजय येलवे(वय-47) रा.माणगाव यांचे मोटार सायकल अपघातात डोक्याला गंभीर स्वरूपाच्या दुखापती होऊन निधन झाले.या अपघाताची खबर जिल्हा वाहतूक शाखा रायगड अलिबागचे माणगाव युनिटमध्ये सेवेत असलेले निलेश अनंत कदम(वय-51) यांनी माणगाव पोलीस ठाण्यात दिली.हा अपघात शुक्रवार दि.6 ऑगस्ट रोजी रात्री 11:30 वाजण्याच्या सुमारास मुंबई -गोवा राष्ट्रीय महामार्ग क्र.66 वरील माणगाव रेल्वे स्टेशन जवळील एच.पी.पेट्रोल पंपाच्या शेजारी रस्त्यावर घडला. कै.विशाल येलवे यांच्या अपघाती निधनाची माहिती सर्वत्र सर्वत्र माणगाव तालुक्यासह रायगड जिल्ह्यात हळहळ व्यक्त करण्यात येत असून येलवे कुटुंबियांवर तसेच त्यांच्या मित्रपरिवारामध्ये शोककळा पसरली आहे.
या अपघाताबाबत माणगाव पोलीस सूत्रांकडून मिळालेली माहिती अशी कि,अपघाताची खबर देणारे वाहतूक पोलीस हवालदार निलेश कदम व मयत वाहतूक पोलीस हवालदार कै.विशाल येलवे हे जिल्हा वाहतूक शाखा रायगड – अलिबाग अंतर्गत माणगाव युनिटमध्ये वाहतूक अंमलदार म्हणून नेमणुकीस आहेत.दि.6 ऑगस्ट 2021 रोजी माणगाव हद्दीत विधान परिषदेचे विरोधी पक्षनेते प्रवीण दरेकर यांचा दौरा कार्यक्रम असल्याने त्याकरिता बंदोबस्त कमी सर्व वाहतूक अंमलदार यांनी हजर राहणेबाबत वरिष्ठांनी सांगितले असल्याने यांतील खबर देणार निलेश कदम यांनी मयत कै.विशाल येलवे यांना सांगितल्यावर सदर रोड बंदोबस्ताकरिता यांतील मयत कै.विशाल येलवे यांनी मी आता रूमवर जाऊन पोलीस ड्रेस करून येतो असे यांतील खबर देणारे निलेश कदम यांना सांगून त्यांच्या ताब्यातील सरकारी मोटार सायकल क्र.एम.एच.06/ए.ए./0251 या गाडीने मुंबई -गोवा राष्ट्रीय महामार्ग क्र.66 ने जात असताना अपघताच्या ठिकाणी आल्यावर सदर मोटार सायकलवरून पडून अपघात होऊन या अपघातात त्यांच्या डोक्यास लहान, मोठ्या गंभीर स्वरूपाच्या दुखापती होऊन त्यामध्ये पोलीस हवालदार विशाल येलवे यांचे दुर्दैवी निधन झाले.या अपघाताची माहिती समजताच माणगाव उपजिल्हा रुग्णालयाकडे पोलीस अधिकारी,कर्मचारी यांच्याबरोबरच कै.विशाल येवले यांच्या नातेवाईकांनी व मित्रांनी धाव घेऊन विशाल येलवे यांच्या निधनाने दुःख व्यक्त केले.या अपघाताची नोंद माणगाव पोलीस ठाण्यात मोटार फेटल अपघात रजि.नं.37/2021 प्रमाणे दाखल करण्यात आली आहे.सदर अपघाताचा अधिक तपास पोलीस निरीक्षक अश्‍वनाथ खेडकर यांच्या मार्गदर्शनाखाली सहाय्यक पोलीस निरीक्षक सागर कावळे हे करीत आहेत.दरम्यान कै.विशाल येलवे हे नाव माणगावसह रायगड जिल्ह्यात सर्वांना परिचित आहे.सतत हसतमुख असणारे हे व्यक्तिमत्व आपल्या सेवेशी नेहमीच तप्तर रहात होते.माणगाव युनिटमध्ये वाहतूक पोलीस म्हणून काम करताना मुंबई-गोवा महामार्गावरील वाहतूक व्यवस्था सुरळीतपणे सुरु ठेवण्यासाठी ते आपल्या सहकार्‍यांसमवेत अथक परिश्रम घेऊन काम करीत असत.जनमाणसात आपली विशेष अशी ओळख निर्माण केली होती.सर्वांशी त्यांचे ऋणानुबंधाचे असे चांगले सलोख्याचे संबंध होते.त्यांच्या आकस्मित निधनाने सर्वत्र हळहळ व्यक्त करण्यात येत आहे.