आता मुंबई – नवी मुंबई प्रवास होणार सुसाट
वाशी खाडीवरील तिसर्‍या पुलाचे काम वेगात; दहा लेनचा मोठा टोल नाका
| नवी मुंबई | प्रतिनिधी |
मुंबई व नवी मुंबईला जोडणार्‍या वाशी खाडीपुलावरील तिसर्‍या खाडीपुलाचे काम वेगात सुरु असताना याच खाडीपुलांच्या कामामुळे वाशी टोलनाक्यावर सातत्याने होणार्‍या वाहतूककोंडीचा फटका दररोज या मार्गावरुन प्रवास करणार्‍या लाखो प्रवाशांना बसत आहे. तासनतास वाहतूक कोंडीचा ताप त्यांना सहन करावा लागत आहे. परंतू याच वाहतूककोंडीतून सुटका करण्यासाठी मुंबई वाशी मार्गावर सध्या सुरु असलेल्या टोलनाक्याच्या पुढे वाशीच्या दिशेला 10 लेनचा नवा टोलनाका तयार करण्यात येत आहे. या 10 लेनच्या टोलनाक्याचे काम मार्चपर्यंत पूर्ण करण्याचे लक्ष रस्ते विकास महामंडळाने ठेवले आहे.
वाशी येथील सध्या सुरु असलेल्या टोलनाक्यावर एकाच ठिकाणी टोल प्लाझा असल्याने दोन्ही मार्गावर वाहतूककोंडी होते. परंतू वाशीच्या दिशेला होणार्‍या नव्या टोलनाक्यामुळे एका ठिकाणी वाहनांची गर्दी कमी होऊन वाहने दोन टोल नाक्यावर विभागली जाणार आहे. कारण सध्या सुरु असलेला टोलनाका हा नव्या टोल प्लाझा नंतर फक्त मुंबईच्या दिशेने जाणार्‍या वाहनांसाठी वापरात येणार आहे. नव्याने होणारा टोलनाका हा फक्त मुंबईहून पुण्याच्या दिशेने जाणार्‍या वाहनांसाठी वापरला जाणार आहे. त्यामुळे नव्या टोलनाक्यामुळे वाहतूक कोंडीची सुटका होण्याची शक्यता आहे. तिसर्‍या खाडीपुलाच्यासाठी जुन्या मार्गावर असलेल्या टोल नाक्यावरील दोन्ही बाजूची प्रत्येकी एक लेन अशा दोन लेन कमी झाल्यामुळे वाहनाचा अतिरिक्त बोजा उर्वरीत लेनवर पडत असल्याचे चित्र आहे. वाशी टोलनाक्यावर सातत्याने वाहनचालकांना वाहतूक कोंडीचा सामना करावा लागत असल्याचे चित्र आहे. सध्या सातत्याने होणारी वाशी खाडी पुलावरील वाहनांची गर्दी नव्या टोलनाक्यामुळे फुटेल अशी शक्यता आहे. याच टोलनाक्यावर सातत्याने छोटे मोठे अपघात होत आहेत. नुकताच एका डंपरने 12 वाहनांना धडक दिल्याची घटना घडली असून दररोज छोटे अपघात होत आहेत.
मुंबईचे मुख्य प्रवेशद्वार असलेल्या वाशी खाडीपुलावरील पहिला पूल मुंबईकडून नवी मुंबईकडे येणार्‍या फक्त हलक्यावाहनांच्या वाहतूकीसाठी वापरला जात होता. तर दुसरा खाडीपुल सध्या वाहतूकीसाठी वापरण्यात येत आहे. दुसर्‍या खाडीपुलावर मुंबईकडे जाण्यासाठी 3 तर मुंबईहून पुण्याकडे जाण्यासाठी 3 लेन आहेत. परंतू सातत्याने वाढणारी वाहनांची संख्या यामुळे नेहमी दुसर्‍या वाशी खाडीपुलावर व सध्याच्या टोलनाक्यावर प्रचंड वाहतूककोंडी होते. तिसर्‍या खाडीपुलाच्या कामामुळे पुणे व मुंबईच्या दिशेने जाणार्‍या मार्गिकांवर टोलनाक्यावर पहाटेपासूनच गर्दी पाहायला मिळते. त्यामुळे वाहनचालकांना सातत्याने वाहतूककोंडीचा सामना करावा लागत आहे. मार्चपर्यंत नवा टोलनाका झाल्यास वाहतूककोंडी फुटेल असा विश्‍वास आहे.
गर्दी विभागणार
सध्या वाशी टोलनाक्यावर एकूण 18 लेन आहेत. 9 मुंबईकडे तसेच 9 पुण्याकडे जाणार्‍या वाहनांसाठी वापरले जातात. परंतू 10 लेनचा नवा टोलनाका वाशीच्या दिशेने झाल्यास एकाच ठिकाणी येणारी वाहनांची गर्दी कमी होईल. तसेच जुन्या टोलनाक्यावरील सर्व लेन मुंबईकडे जाणार्‍या वाहनांसाठी वापरल्या जाणार असल्याने वाहतूककोंडी होणार नाही.
नवा टोल नाका हा मुंबईहून वाशीच्या दिशेला सध्या सुरु असलेल्या टोलनाक्याचा पुढे होत असून मार्चपर्यंत काम पूर्ण करण्याचा रस्ते विकास महामंडळाचा प्रयत्न आहे. त्यामुळे लवकरात लवकर नवा टोल प्लाझा झाला तर वाहनांची विभागणी होऊन वाहतूकोंडीतून प्रवाशांची सुटका करण्याचा प्रयत्न असल्याची माहिती रस्ते विकास महामंडळाच्या एका वरिष्ठ अधिकार्‍याने दिली आहे.
